Vətən müharibəsi iştirakçılarına təhsildə güzəşt ediləcək

19 Aprel 2021 19:52 (UTC+04:00)

Dövlət ali təhsilə qəbulun çevik və proqressiv formalarının tətbiqini təmin edir. Ali təhsil müəssisələrinə qəbul olmaq hüququna tam orta, yüksək texniki peşə, orta ixtisas və ya ali təhsili başa vurmasını təsdiq edən təhsil haqqında dövlət sənədi almış şəxslər malikdirlər.

Aznews.az xəbər verir ki, bu, “Ali təhsil haqqında” qanun layihəsinin ilkin versiyasında əksini tapıb. Ali təhsil müəssisələrinin bakalavriat səviyyəsinə müvafiq ixtisaslar üzrə subbakalavrların qəbulu müvafiq icra hakimiyyəti orqanı tərəfindən müəyyən olunmuş qaydada həyata keçirilir.

Ali təhsil müəssisəsinin bakalavriat səviyyəsinə müvafiq ixtisaslar üzrə subbakalavrların qəbulu, habelə bakalavriatı (əsas (baza ali) tibb təhsilini) başa vurmayan şəxslərin öz arzusu ilə orta ixtisas təhsili müəssisələrinə köçürülməsi müvafiq icra hakimiyyəti orqanının müəyyən etdiyi orqanın (qurumun) müəyyən etdiyi qaydada həyata keçirilir.

Ali təhsil müəssisələrinə, həmçinin hazırlıq qruplarına tələbə qəbulu müvafiq kvalifikasiyaya malik şəxslərin müvafiq kvalifikasiya üzrə qazandıqları təlim nəticələrinin səviyyəsinin müəyyən edilməsi məqsədilə keçirilən imtahanlarda əldə etdikləri nəticələrə əsasən müvafiq icra hakimiyyəti orqanının müəyyən etdiyi qaydada həyata keçirilir.

Ali təhsil müəssisələrinin hazırlıq qruplarına qəbul qaydaları, kvotalar və tədrisin təşkili qaydaları müvafiq icra hakimiyyəti orqanı tərəfindən müəyyən edilir. Ali təhsil müəssisələrinin hazırlıq qruplarına qəbul zamanı Azərbaycanın ərazi bütövlüyü uğrunda döyüşlərin (Qarabağ-Vətən müharibəsinin) iştirakçılarına müəyyən kvota ayrılır və onların təhsili dövlət hesabına həyata keçirilir.

Müvafiq icra hakimiyyəti orqanı tərəfindən ali təhsilə qəbul mexanizmləri aşağıdakı prinsiplər əsasında müəyyən edilir:

- tam orta təhsil proqramı üzrə yekun attestasiya nəticələri nəzərə alınmaqla mərkəzləşdirilmiş attestasiya yoxlamasının təşkili;

- profilindən və xüsusiyyətindən asılı olaraq tam orta təhsil üzrə yekun attestasiya, mərkəzləşdirilmiş və canlı müsahibələrin (intervyular) ibarət olan qarışıq qəbul prosesi;

- beynəlxalq koqnitiv qiymətləndirmə standart testlərinin nəticəsi hesablanmaqla təşkil edilən qəbul prosesi. Bu proses müvafiq test nəticələrinin qəbul olunduğu təhsil proqramlarına şamil edilir;

- təhsil proqramının spesifikasiyasından asılı olaraq ixtisaslaşmış testləşmənin daxil olduğu qarışıq məzkərləşdirilmiş attestasiya. İxtisaslaşmış testləşmə müvafiq icra hakimiyyəti orqanı tərəfindən əvvəlcədən təsdiq edilmiş təhsil proqramlarının siyahısı üzrə həyata keçirilir.

Ali təhsil müəssisələrinin müvafiq ixtisas qrupuna daxil olan ixtisasları üzrə müsabiqə abituriyentlərin qəbul imtahanında topladığı ümumi bal əsasında aparılır. Təhsilalma formasından asılı olmayaraq, hər hansı bir ixtisasa yerləşdirilmiş abituriyent tələb olunan sənədləri müvafiq icra hakimiyyəti orqanı tərəfindən təsdiq edilmiş ali təhsil müəssisələrinə tələbə qəbulu qaydalarında müəyyən edilən müddətdə qəbul olduğu təhsil müəssisəsinə təqdim etməklə qeydiyyatdan keçməlidir. Abituriyentin bu müddətdə təhsil müəssisəsində qeydiyyatdan keçməməsi onun yerləşdirildiyi ixtisas üzrə təhsil almaqdan imtina etməsi kimi qiymətləndirilir. Bu abituriyentlər boş qalan yerlər üzrə keçirilən müsabiqəyə buraxılmırlar.

Azərbaycanın ali təhsil müəssisələrinə keçirilən müsabiqə və onun nəticələri ilə bağlı vətəndaşların müraciətlərinə baxılması üçün müvafiq icra hakimiyyəti orqanı tərəfindən təsdiq edilmiş qaydalarına tələblərinə uyğun Apelyasiya Komissiyası yaradılır. (Apa)