Neft Şirkətinə 58 milyon dollar kredit ayrılıb
23 İyun 2013 12:07 (UTC+04:00)
Qara Dəniz Ticarət və İnkişaf Bankı Azərbaycana irihəcmli kredit verir
Qara Dəniz Ticarət və İnkişaf Bankı (QDTİB) Azərbaycan Respublikası Dövlət Neft Şirkətinə (ARDNŞ) kredit ayıracaq. "APA-Economics"in məlumatına görə, bunu QDTİB-in prezidenti Andrey Kondakov bildirib.
Onun sözlərinə görə, QDTİB ARDNŞ-la ARDNŞ-in Türkiyədə "STAR" neft emalı zavodunun tikintisinə 58 milyon ABŞ dolları məbləğində kredit ayıracaq: "Bankın Direktorlar Şurası sözügedən kreditin ayrılmasını artıq təsdiqləyib və kredit bu ilin sonunadək ayrılacağı gözlənilir. Onu da əlavə edim ki, bu kredit QDTİB-in tarixində ayırılacaq ən irihəcmli kreditdir".
A.Kondakov onu da əlavə edib ki, kredit 18 ilədək ayrılacaq, halbuki, Bank bundan öncə kreditləri maksimal olaraq 10 ilədək ayırıb.
Xatırladaq ki, ARDNŞ-in Türkiyədə "STAR" neft emalı zavodunun tikintisi layihəsi 5,1 milyard dollar məbləğində qiymətləndirilir.
1996-cı ildə təsis edilən QDTİB 1999-cu il iyunun 1-də fəaliyyətə başlayıb. Azərbaycan 2002-ci ildən bu Bankın üzvüdür. QDTİB regional əməkdaşlığın inkişafı prinsiplərini dəstəkləyərək üzv ölkələrdə layihələrin maliyyələşdirilməsi və səhmdar kapitalda iştirakla bağlı layihələr həyata keçirir. Beynəlxalq maliyyə institutu olan QDTİB-in səhmdarları rolunda 11 ölkə (Azərbaycan, Türkiyə, Albaniya, Ukrayna, Gürcüstan, Bolqarıstan, Moldova, Rumıniya, Rusiya, Yunanıstan və Ermənistan) çıxış edir. Azərbaycan QDTİB-də 5% paya malikdir.
AzNews.az