"Ermənistan və İran Azərbaycana təzminat ödəməlidirlər"

14 Sentyabr 2021 17:38 (UTC+04:00)

"Gorus-Qafan yolunun Azərbaycanın Qubadlı rayonunun ərazisindən keçən hissəsində polis postunun yerləşdirilməsi erməni mediasının əsas müzakirə mövzusuna çevrilib. Müzakirələrdə erməni cəmiyyətinə xas yanaşma – təlaş, qorxu və əsassız iddialar, ittihamlar yer almaqdadır.
Ermənistan siyasətçiləri iddia edirlər ki, Gorus-Qafan yolu “beynəlxalq avtomobil yoludur” və Azərbaycan bu yolun öz ərazisindən keçən hissəsində polis nəzarəti məntəqəsi yerləşdirməklə beynəlxalq hüquq normalarını pozur. Lakin hər zaman olduğu kimi beynəlxalq hüququn hansı norma və prinsiplərinin pozulduğu haqqında danışmırlar".

AzNews.az xəbər verir ki, bunları “Xalq Cəbhəsi” qəzetinin baş redaktoru, siyasi şərhçi Elçin Mirzəbəyli feysbuk hesabında yazıb.

"Bu klassik yalançılar unudurlar ki, Gorus-Qafan yolunun bir hissəsi Azərbaycan Respublikasının ərazisindən keçdiyi üçün bu yol vasitəsilə həyata keçirilən bütün daşınmalar beynəlxalq tranzit daşınmalar hesab olunur və Sərhəddə yüklərə nəzarətin həyata keçirilməsinin şərtlərinin razılaşdırılması haqqında Konvensiyaya görə, tranzit yük və sərnişin daşınmalarının həyata keçirilməsi üçün dövlətlərarası müqavilə, yaxud müqavilələr olmalıdır", - deyə o əlavə edib.

E. Mirzəbəyli bildirib ki, Gorus-Qafan yolu və bu yolun Azərbaycan ərazisindən keçən hissəsi ilə bağlı isə Azərbaycanla Ermənistan və İran arasında nə ikitərəfli müqavilələr, nə də üçtərəfli müqavilə imzalanmayıb: "Əksinə, 30 ilə yaxın bu müddət ərzində Ermənistan və İran qanunsuz olaraq Azərbaycan ərazilərindən yük daşınmaları həyata keçirib və hər iki ölkə buna görə Azərbaycana təzminat ödəməlidir".

Onun sözlərinə görə, Azərbaycan isə Sərhəddə yüklərə nəzarətin həyata keçirilməsinin şərtlərinin razılaşdırılması haqqında Konvensiyaya, eyni zamanda Avtomobil yolları ilə beynəlxalq yük daşınmaları müqavilələri haqqında Konvensiyaya uyğun olaraq, ölkə ərazisindən keçən bütün yükləri yoxlaya, gömrük və fitosanitar nəzarəti, eləcə də digər prosedurları həyata keçirə bilər.