“Bəzi deputatların Dağlıq Qarabağa səfərləri qanunsuzdur“
1 İyul 2013 15:40 (UTC+04:00)
"Təəssüf ki, qanunvericilik orqanlarının bəzi nümayəndələri Azərbaycanın işğal altında olan ərazilərinə rəsmi Bakı ilə razılaşdırmadan qanunsuz səfərlər edirlər. Bu cür səfərlər qanunsuzdur, münaqişənin nizamlanmasına neqativ təsir göstərir və erməni tərəfində müəyyən illüziyalar yaradır".
Azərbaycan XİN mətbuat xidmətinin rəhbəri Elman Abdullayev Rusiya Dövlət Dumasının deputatı Oleq Paxolkovun Dağlıq Qarabağa səfərini APA-ya belə şərh edib.
Diplomat qeyd edib ki, bu kimi səfərlərin Azərbaycanın müvafiq orqanları ilə razılaşdırılmaqla həyata keçirilməsinə dair hallar da var, belə hallarda həmin şəxslər Azərbaycana səfər üçün viza alırlar.
Xatırladaq ki, Ermənistan KİV-in məlumatına görə, Rusiya Dövlət Dumasının üzvü, "Ədalətli Rusiya" parlament fraksiyasından deputat Oleq Paxolkov dostlarının dəvəti ilə Azərbaycanın işğal altında olan ərazilərinə səfər edib və burada separatçı rejimin nümayəndələri ilə görüşlər keçirib.
AzNews.az