Brüssel format dirçəldilir?

26 Fevral 2024 09:00 (UTC+04:00)

Avropa İttifaqı Şurasının Prezidenti Şarl Mişel Azərbaycan Prezidenti İlham Əliyevə zəng edib və onu seçkidə qələbə münasibətilə təbrik edib. Telefon danışığı əsnasında Azərbaycan və Avropa İttifaqı arasında əlaqələrin müxtəlif aspektləri, xüsusilə energetika və nəqliyyat sahəsində əməkdaşlıq məsələləri müzakirə olunub. Telefon danışığının Paşinyanla da baş tutması Şarl Mişelin yaxın günlərdə İlham Əliyevlə Nikol Paşinyanı Brüsselə dəvət etmək istəyindən qaynaqlanır.

19 sentyabrda baş tutmuş qısamüddətli anti-terror tədbirlərindən sonra Avropa İttifaqının qərəzli münasibəti, eləcə də Fransanın destruktiv mövqeyi sayəsində bu format fiaskoya uğramışdı. Lakin hazırda formatın dirçəldilməsi istiqamətində Şarl Mişelin ciddi cəhdlərinin olduğunu görə bilirik. Azərbaycan tərəfi üçün hansı formatın qüvvədə olmasının heç bir fərqi yoxdu. Yetər ki, həmin format prosesə tam obyektiv yanaşsın, ədalətli mövqe sərgiləsin.

Bugün iki ölkə arasında münasibətlərin yaranması üçün real zəmin formalaşıb. Hərçənd ki, İrəvan Qərbdəki bəzi pozucu qüvvələrin şərtlər diktə etməsindən yayına bilmir. Ən son Almaniya konsleri Olaf Şoltsun vasitəçiliyi ilə görüşün baş tutması da gələcəyə yönəlik ümidləri artırmış oldu. Bu görüş göstərdi ki, əvvəla Bakının haqlı istəyi Qərbdə qəbul olunub və Fransa danışıqlardan kənarlaşdırılıb.

İkinci önəmli faktor isə odur ki, Olaf Şolts görüşü yarımçıq tərk etməklə İlham Əliyevin vasitəçisiz həll variantını dəstəkləmiş oldu. Bütün bunlar formatın dirçəldilməsi və yaxında ciddi praktiki nəticə əldə olunma ehtimalını artırır. Lakin istənilən halda ortada ciddi problemlər var və onlar üzərində xüsusi fokuslanmadıqca yekun sülh yubadılmış olacaq. Söhbət sərhəd və kommunikasiya məsələsində mövcud olan ciddi fikir ayrılığının son dövrlər daha da dərinləşməsindən və təxribat ritorikasından hələ də İrəvanın yayınmamasından gedir.

Züriyə Qarayeva

Aznews.az portalının siyasi şərhçisi

QEYD: Məqalə Azərbaycan Respublikası Medianın İnkişafı Agentliyinin maliyyə dəstəyi ilə ictimai və dövlət maraqlarının müdafiəsi sahəsi üzrə hazırlanmışdır.