Moskvada 44 yaşlı azərbaycanlı saxlanıldı
13 Avqust 2013 12:32 (UTC+04:00)
Rusiya paytaxtının şimal-şərqində qeyri-leqal miqrasiyanın təşkilində şübhəli bilinən 44 yaşlı azərbaycanlı saxlanılıb. APA-nın Rusiya Daxili İşlər Nazirliyinin Moskva üzrə Baş İdarəsinə istinadən verdiyi xəbərə görə, Anadır döngəsində yerləşən bazarın ərazisində miqrantların qanunsuz məskunlaşması faktı aşkar edilib.
Araşdırma nəticəsində bəlli olub ki, azərbaycanlı anbarların olduğu məkanları icarəyə götürərək orada 10 Azərbaycan vətəndaşının məskunlaşmasını təşkil edib. O, həmin şəxslərin miqrasiya qanunvericiliyinə zidd olaraq Rusiya ərazisində olmalarını bilməsinə baxmayaraq, onları iş yeri ilə də təmin edib. Bu şəxslərin inzibati məsuliyyətə cəlb olunmaları üçün onlar barədə materiallar Rusiya Miqrasiya Xidmətinə təqdim olunub. Saxlanılan 44 yaşlı azərbaycanlı haqqında "qanunsuz miqrasiyanın təşkili" maddəsi ilə cinayət işi açılıb.
AzNews.az