Azərbaycana yeni qədim əlyazma gətirildi

15 Avqust 2013 18:50 (UTC+04:00)

Azərbaycan Milli Elmlər Akademiyasının (AMEA) Əlyazmalar İnstitutu ölkəyə yeni qədim əlyazma gətirib. Bu barədə Trend-ə institutun direktor əvəzi Paşa Kərimov məlumat verib.

O bildirib ki, 15-ci əsr osmanlı şairi Ətainin Nizami Gəncəvinin təsiri ilə türkcə yazdığı "Miniatürlü xəmsə" əsərinin bir nüsxəsinin surəti ABŞ-ın Merilend ştatının Baltimor şəhərindəki Volters İncəsənət Muzeyindən Azərbaycana gətirilib. Nəfis əlyazma olan həmin nüsxə 340 səhifədən ibarətdir.

P.Kərimovun sözlərinə görə, Qacar şahzadəsi Nadir Mirzə Qacarın qədim milli xörəklərimizin reseptlərindən ibarət "Karnamə" adlı kitabı fars dilindən tərcümə edilərək çap edilib.

AzNews.az