Çexiya parlamenti vaxtından əvvəl buraxıldı

20 Avqust 2013 20:44 (UTC+04:00)
Çexiya parlamentinin Aşağı Palatasının deputatları parlamentin vaxtından əvvəl buraxılmasına səs verib.

APA-nın "İTAR-TASS"a istinadən verdiyi xəbərə görə, qərarın qəbulu üçün 120 deputatın səs verməsi şərt olduğu halda, 140 deputat "lehinə" səs verib. Qərarın "əleyhinə" isə cəmi 7 parlamentari səs verib.

Çexiya parlamentinin Aşağı Palatasının səlahiyyətlərinin vaxtından əvvəl dayandırılmasının əleyhdarlarının az olmasının səbəbi hakim Vətəndaş Demokratik Partiyasının deputatlarının səsvermədən əvvəl zalı tərk etməsi olub.

Aşağı Palatanın buraxılmasına, gözlənildiyi kimi, Çexiya Sosial-Demokrat Partiyası, Kommunist Partiyası, "TOR 09" və "İctimai İşlər" partiyalarından olan deputatlar səs verib.

Çexiya konstitusiyasına görə, vaxtından əvvəl parlament seçkiləri bu günkü qərardan sonra 60 gün ərzində keçirilməlidir. Seçkilərin tarixini prezident Miloş Zeman təyin edəcək.

Növbəti seçkilər 2014-cü ilin mayında baş tutmalı idi.

AzNews.az