Mark Zukerberqin profilini dağıdan hakerə hədiyyə
21 Avqust 2013 20:09 (UTC+04:00)
Facebook sosial şəbəkəsində boşluq aşkarlayan haker Xəlil Şritex 10 min dollar hədiyyə alacaq.
Bu hədiyyəni onun üçün haker həmkarları toplayacaqlar.
Qeyd edək ki, Xəlil Şritex bir neçə gün əvvəl Facebook sosial şəbəkəsində zəiflik olduğunu açıqlamışdı. Bu zəiflik sayəsində Facebook-da başqasının adından statuslar yazmaq mümkündür.
Bu faktı aşkar edən Xəlil Facebook-un texnikləri ilə əlaqə saxlayıb. Sosial şəbəkənin mütəxəssisləri deyiblər ki, bu, zəiflik deyil. Bundan sonra öz sözlərini təsdiq etmək üçün Xəlil Facebook sosial şəbəkəsinin yaradıcısı Mark Zukerberqin adından post yerləşdirib.
"Bağışla ki, sənin səhifəndəki yazıların qaydalarını pozuram. Ancaq mənim Facebook komandasına göndərdiyim məktublardan sonra başqa yolum qalmadı", - Xəlil Facebook-un baş direktorunun səhifəsində yazıb.
Qaydaya əsasən, Facebook sosial şəbəkəsində boşluq barədə informasiyanı aşkarlayan mütəxəssislərə 500 dollar məbləğində mükafat verirlər. Lakin bu halda Xəlilə mükafat verilməyib. Çünki qaydalara əsasən, həmin boşluq göstərilərkən test üçün profillərdən istifadə olunmalıdır. Xəlil isə real adamın, həm də Facebook-un baş direktorunun profilindən istifadə etmişdi.
AzNews.az