“Prezident konkret bir qərar qəbul etməyib“

2 Sentyabr 2013 10:47 (UTC+04:00)
"Suriyaya müdaxilə məsələsi heç ABŞ-da belə konkret bir şəkil almayıb. Çox yaxşı bilirsiniz ki, bu gün hələ ABŞ Konqresi və Prezidenti bu məsələ ilə bağlı konkret bir qərar qəbul etməyib. Yaxşı olar ki, biz bu mövqenin konkret nədən ibarət olduğunu gözləyib, sonra mövqe bildirək".

APA-nın məlumatına görə, bu fikirləri Prezident Administrasiyası rəhbərinin müavini, PA xarici əlaqələr şöbəsinin müdiri Novruz Məmmədov Azərbaycan Prezidenti Yanında Strateji Araşdırmalar Mərkəzinin təşkil etdiyi "Dəyişən dünyada Cənubi Qafqaz" forumunun sual-cavab hissəsində deyib.

PA rəsmisi bildirib ki, Azərbaycanın indidən bu məsələyə mövqe bildirməsi siyasi məntiqə və diplomatik məntiqə uyğun olmazdı: "Amma bu sualı yaxş. Olardı ki, ümumiyyətlə Azərbaycanın indiyə qədər apardığı xarici siyasət kursu, bu istiqamətdə göstərdiyi fəaliyyət, eyni zamanda Azərbaycanın iki ildir ki, Birləşmiş Millətlər Təşkilatının Təhlükəsizliyi Şurasında apardığı siyasəti də siz nəzərə alıb verəydiniz".

AzNews.az