13 dönərçi cəzalandırıldı
3 Sentyabr 2013 09:30 (UTC+04:00)
"Bu ilin avqust ayı ərzində Respublika Gigiyena və Epidemiologiya Mərkəzi tərəfindən 13 dönər satışı sahəsində yoxlamalar və müayinələr aparılıb. Bu müəssisələrin sahibləri müvafiq qaydada cəzalandırılıb, 1 dönər sahəsinin fəaliyyəti dayandırılıb".
Bu barədə APA-ya açıqlamasında Səhiyyə Nazirliyinin Respublika Gigiyena və Epidemiologiya Mərkəzinin (RGEM) şöbə müdiri İmran Abdullayev məlumat verib.
O bildirib ki, yoxlama aparılan 13 müəssisənin cərimə olunması haqqında qərar çıxarılıb və cərimələr ayrı-ayrılıqda rayon icra hakimiyyətlərinə göndərilib. İ. Abdullayevin sözlərinə görə, cərimələri könüllü ödəyənlər ödəyib, ödəməyənlər isə məcburi icraya yönəldilib.
RGEM-in şöbə müdiri qeyd edib ki, bu ilin 6 ayı ərzində Bakı, Abşeron, Sumqayıt ərazisində 57 dönər sahəsində yoxlamalar aparılıb. Bu yoxlamalar nəticəsində toyu dönəri satan və sanitariya qaydalarını ciddi pozan müəssisələr haqqında inzibati tədbirlər görülüb.
AzNews.az