Kürdəmirdə qaz işçisi korrupsiyada ittiham olunur

4 Sentyabr 2013 15:12 (UTC+04:00)
Kürdəmir Qaz istismar sahəsinin baş mühəndisinin qanunsuz hərəkətləri barədə Baş Prokurorluğa daxil olmuş material Baş prokuror yanında Korrupsiyaya qarşı mübarizə idarəsində araşdırılıb.

Bu barədə AzNews.az-a Respublika Prokurorluğunun mətbuat xidmətindən daxil olub.

Məlumata görə, sahənin baş mühəndisi Orxan Məmmədovun öz qulluq səlahiyyətlərindən sui istifadə etdiyi bildirilir. O.Məmmədov qulluq mənafeyinə qəsdən zidd olaraq ayrı-ayrı şəxslərdən qanunsuz vəsait toplayıb. Belə ki, şöbə rəisi Qabil Əliyevdən 2013-cü ilin yanvar-fevral aylarında təbii qazdan istifadəyə görə əhalidən toplanan ödəniş pullarından 1.440 manat, Kürdəmir rayon sakini Güləhməd Ovçiyevdən işə qəbul etdirmək adı ilə 400 manat, xidmət rəisi Yavər Abbasovdan dələduzluq yolu ilə 300 manat məbləğində pulu ələ keçirib.

Bundan başqa sahə nəzarətçisi Telman Eyyubovu işdən çıxaracağı ilə hədələməklə 1.000 manat pul tələb edib. T.Eyyubov pulu vermədiyi üçün onu işdən çıxarmasında şübhələr üçün əsaslar olduğundan fakta görə Cinayət Məcəlləsinin 308.1 (vəzifə səlahiyyətlərindən sui-istifadə) və 178.2.3-cü (dələduzluq yolu ilə özgə əmlakını külli miqdarda ələ keçirmə) maddələri ilə cinayət işi başlanıb.

Hazırda Baş prokuror yanında Korrupsiyaya qarşı mübarizə idarəsində iş üzrə istintaq davam etdirilir.

AzNews.az