2025-ci ilin ilk 6 ayında Azərbaycanda yeni doğulan körpələrə qoyulan adlar cəmiyyətin diqqətini yenidən bu mövzuya yönəldib. Ədliyyə Nazirliyinin yaydığı məlumata görə, ilin əvvəlindən oğlan uşaqları üçün ən çox seçilən ad Uğur olub. Ümumilikdə 802 ailə övladına bu adı verib. Sonrakı sıralarda Hüseyn (534), Raul (521), Əli (518) və Yusif (516) adları gəlir. Qız uşaqları arasında isə Zəhra adı üstünlük qazanıb və 533 körpəyə qoyulub. Melisa (515), Məryəm (511), Zeynəb (508) və Nilay (484) da valideynlərin ən çox rəğbət göstərdiyi adlar olub.
Adlar cəmiyyətin ümumi mədəniyyətinin güzgüsüdür, çünki insanların inamları, dəyərləri, dini baxışları və estetik zövqləri məhz bu seçimdə öz əksini tapır. Tarixən müxtəlif dövrlərdə adlar həm mənəvi simvol daşıyıb, həm də ailələrin övladları üçün arzu və dualarını ifadə edib. Məsələn, "Uğur" adı ailələrin uşaqlarının həyat yolunda müvəffəqiyyətli və şanslı olmasını diləməsinin göstəricisidir, "Zəhra" isə həm dini bağlılıq, həm də zəriflik və nəciblik anlamı ilə seçilir.
Müasir dövrdə valideynlər ad seçərkən təkcə populyarlığa deyil, həm də onun mənasına, səslənişinə, yazılış rahatlığına və uşağın gələcək şəxsiyyətinə uyğunluğuna diqqət yetirirlər. Bu seçim, əslində, uşağın həyatına müşayiət edən ilk sosial “etiket”, bir növ kimlik bəlgəsidir.
Həddindən artıq qeyri-adi, anlaşılmaz və ya mənfi çağırış yaradan sözləri ad kimi seçmək gələcəkdə uşağın psixoloji rahatlığına və ictimai münasibətlərinə mənfi təsir edə bilər. Ad həm səlis səslənməli, həm asan tələffüz olunmalı, həm də yaş artdıqca onun şəxsiyyətinə yaraşmalıdır. Bir çox ailə nəsillərdən miras qalan adlara üstünlük verir, bəziləri isə beynəlxalq səviyyədə tanınan, daha müasir adlar seçməyi məqsədəuyğun sayır.
Ən əsası isə unutmaq olmaz ki, ad yalnız rəsmi sənəddə qeydiyyatdan keçən söz deyil, bir ömürlük dəyər və kimlikdir. Valideynlər ad seçərkən həm ürəklərinin səsinə, həm də ağılın göstərişlərinə qulaq asmalı, cəmiyyətin baxışını və uşağın gələcəkdə daşımalı olduğu məsuliyyəti nəzərə almalıdırlar. Müasir Azərbaycanda müxtəlif mədəniyyətlərdən ilhamlanaraq seçilən adlar bir tərəfdən cəmiyyətin dünyagörüşünün açıq olduğunu göstərir, digər tərəfdən isə hər bir adın necə diqqətlə və məsuliyyətlə seçilməsinin vacibliyini xatırladır. Uşağa verilən ad onun həyat yolunda həm mənəvi dayağa, həm də şəxsiyyətinin ayrılmaz hissəsinə çevrilir və valideynlərin övladlarına bəxş etdiyi ilk, ən dəyərli hədiyyə olaraq qalır.
Pərvanə,
AzNews.az