Bu ilin iyul ayının 1-nə Azərbaycanda vergi ödəyicilərinin sayı 1 milyon 630 minə çatıb. Dövlət Vergi Xidmətinin açıqladığı rəsmi məlumata görə, ötən ilin eyni dövrü ilə müqayisədə ümumi artım 4,8 faiz təşkil edir. Vergi ödəyicilərinin 86,9 faizi fiziki şəxslər, 13,1 faizi isə hüquqi şəxslər və digər təşkilatlardır. Eyni zamanda, kommersiya hüquqi şəxslərin sayında 7,7 faiz, fiziki şəxslərdə isə 4,4 faiz artım qeydə alınıb.
Aznews.az şərh edir ki, vergi ödəyicilərinin və kommersiya qurumlarının sayındakı bu dinamik artım iqtisadi fəallığın yüksəlməsi, sahibkarlıq mühitində canlanma və biznes mühitinin rəqabətqabiliyyətli olduğunu göstərir. Bu il kommersiya qurumlarının sayı 8,1 faiz çoxalıb və hazırda ölkədə 197 min kommersiya hüquqi şəxs fəaliyyət göstərir. Onların 91,7 faizi məhdud məsuliyyətli cəmiyyət kimi qeydiyyata alınıb ki, bu da Azərbaycanda KOB sektorunun rolunun artdığını sübut edir.
Qeyd etmək lazımdır ki, yeni yaradılan kommersiya qurumlarının böyük hissəsi - 85,3 faizi elektron qaydada qeydiyyatdan keçib. Xüsusilə yerli investisiyalı məhdud məsuliyyətli cəmiyyətlərin elektron qeydiyyata marağı 96,6 faizə çatır. Bu göstəricilər bir tərəfdən rəqəmsal iqtisadiyyatın inkişafını, digər tərəfdən dövlətin biznes üçün şəffaf və rahat şərait yaratdığını əks etdirir. Xarici investisiyalı kommersiya qurumlarının payı isə 11,1 faizdir ki, bu da ölkənin biznes mühitinə beynəlxalq marağın artdığını göstərir.
Dünyanın inkişaf etmiş ölkələrinin təcrübəsi də göstərir ki, vergi ödəyicilərinin və biznes subyektlərinin sayındakı artım uzunmüddətli iqtisadi sabitliyin, yeni iş yerlərinin və innovasiyaların açarıdır. Azərbaycanda da bu trend həm regionlarda iqtisadi fəallığın artmasına, həm də vergi daxilolmalarının çoxalmasına şərait yaradır. Sahibkarlığın inkişafı üçün təqdim olunan dövlət dəstəyi və rəqəmsal platformaların tətbiqi, vətəndaşların öz biznesini qurmasına və leqallaşdırmasına daha çox stimul verir.
Başqa sözlə, vergi ödəyicilərinin və kommersiya subyektlərinin sayındakı artım, həm dövlətin, həm də bazarın inkişaf potensialını nümayiş etdirir və iqtisadiyyatın davamlı böyüməsinə real zəmin yaradır.
Nuray,
Aznews.az