Yekaterinburqda azərbaycanlılara qarşı qaldırılan cinayət işinin daha bir iştirakçısı - Əhliman Gənciyevin vəkili həbs qərarından məhkəməyə apellyasiya şikayəti verib.
Bu barədə AzNews.az Rusiya KİV-ə istinadən məlumat verir.
"Əhliman Gənciyevlə bağlı vəkildən apellyasiya şikayəti daxil olub", - Sverdlovsk vilayət məhkəməsinin mətbuat xidmətindən bildirilib.
Qeyd edək ki, üç iştirakçının - Akif Səfərov, Ayaz Səfərov və Şahin Lalayevin vəkilləri də məhkəmə qərarından apellyasiya şikayəti veriblər.
Bu iş üzrə ümumilikdə 8 azərbaycanlı həbs edilib.
Yekaterinburqda keçmiş illərdə qətl törəkməkdə ittiham olunan Ayaz Səfərov və Şahin Lalayev qərara etiraz ediblər.
Bu barədə TASS-a Sverdlovsk vilayəti məhkəmələrinin birləşmiş mətbuat xidməti məlumat verib.
Əvvəllər Yekaterinburqun Lenin rayon məhkəməsi 8 azərbaycanlını - Ayaz, Akif, Məzahir, Kamal və Bakir Səfərovları, Əhliman Gənciyevi, Şahin Lalayevi və Əziz Abasovu həbs edib. Akif Səfərov da daha əvvəl həbs qərarına etiraz edib.
"Ayaz Səfərov və Şahin Lalayevlə bağlı vəkillərdən apellyasiya şikayətləri daxil olub", - deyə agentliyin müsahibi bildirib.
Ayaz Səfərov və Şahin Lalayev 19 iyul həbs ediliblər.
Xatırladaq ki, iyunun 27-də səhər Rusiya Federal Təhlükəsizlik Xidməti Yekaterinburqda azərbaycanlıların evlərinə basqın edib. Reyd zamanı iki nəfər öldürülüb, bir neçə nəfər isə xəsarət alıb. Öldürülən azərbaycanlılar tanınmış jurnalist Seyfəddin Hüseynlinin qardaşlarıdır. Onlar iyulun 1-də Ağcabədidə dəfn olunublar.
Azərbaycan Xarici İşlər Nazirliyi iyunun 28-də bəyanatla çıxış edərək, araşdırma aparılmasını və bu yolverilməz zorakılıq aktının günahkarlarının məsuliyyətə cəlb edilməsini tələb edib. Daha sonra XİN-ə Rusiyanın müvəqqəti işlər vəkili çağırılıb, ona baş verənlərlə bağlı kəskin etiraz bildirilib.