Bu gün Yardımlıda yeniyetmə bir qızın müəllimi tərəfindən qaçırılması barədə xəbər yayılıb. İddialara görə, repetitorluq fəaliyyəti ilə məşğul olan bir şəxs öz şagirdi olan 17 yaşlı qızı evlənmək məqsədi ilə qaçırdıb. Məlum olub ki, qız bu il orta məktəbi başa vurub, artıq rəsmi olaraq şagird statusunda deyil. Hazırda məsələ ilə bağlı Yardımlı Rayon Polis Şöbəsində araşdırma aparılır.
Zira, bu hadisə repetitorluğun qeyri-nəzarətli mühitlərdə necə təhlükəli nəticələr doğura biləcəyini göstərən acı bir nümunədir. Son illər valideynlər övladlarının universitetə hazırlığı üçün məktəbdənkənar tədrisə üstünlük verirlər. Lakin bu sahədə nəzarət mexanizmlərinin, etik davranış standartlarının və hüquqi tənzimləmələrin zəif olması tədris münasibətlərini istənilən an şəxsi istismar alətinə çevirə bilər.
Repetitorluq fəaliyyətində təkcə pedaqoji bilik deyil, həm də etik məsuliyyət, psixoloji yanaşma və davranış hədləri çox mühüm rol oynayır. Ev şəraitində və ya nəzarətsiz mühitlərdə keçirilən dərslər bəzi hallarda müəllim və şagird arasında sərhədlərin pozulmasına səbəb ola bilir. Bu kimi hadisələr göstərir ki, repetitor bazarının tənzimlənməsi artıq sadəcə təhsil keyfiyyəti ilə yox, mənəvi və hüquqi təhlükəsizliklə də birbaşa əlaqəlidir.
Təhsil mühitində müəllim–şagird münasibəti müqəddəs və toxunulmaz sayılır. Bu münasibətə xələl gətirən hər hansı davranış — xüsusilə də yetkinlik yaşına çatmayanlara qarşı zor tətbiqi və ya manipulyasiya — cəmiyyətin bütün təbəqələrinə mənəvi zərbə vurur. Ona görə də repetitorluq fəaliyyətində etik nəzarət, müəllimlərin peşə davranışı kodeksi, eləcə də ailələrin daha diqqətli davranışı son dərəcə vacibdir.
Bu hadisə təkcə hüquqi yox, sosial və pedaqoji nəticələri baxımından da dərindən araşdırılmalı və bu sahədə profilaktik tədbirlər gücləndirilməlidir. Repetitorluq yalnız bilik ötürmək deyil, həm də şəxsiyyətə toxunmaq məsuliyyətidir. Bu məsuliyyəti dərk etməyənlər üçün isə cəza tək hüquqi tədbir deyil, eyni zamanda ictimai qınağın da predmeti olmalıdır.
AzNews.az