Gələn həftədən etibarən ölkə üzrə məktəbəqədər təhsil müəssisələrinə – yəni uşaq bağçalarına qəbul prosesi başlayır. Bu barədə məlumatı Məktəbəqədər və Ümumi Təhsil üzrə Dövlət Agentliyi yayıb. Bildirilir ki, 2025–2026-cı tədris ili üzrə bağçaya qəbul üçün valideynlər iyulun 18-i saat 11:00-dan başlayaraq Regional Təhsil İdarələrinin və Naxçıvan Muxtar Respublikasının tabeliyində olan məktəbəqədər təhsil müəssisələri üçün, iyulun 25-i saat 11:00-dan etibarən isə Bakı şəhəri üzrə müəssisələr üçün elektron sistemdə növbə yarada biləcəklər. 2020 və 2021-ci il təvəllüdlü uşaqlar üçün növbə sistemi saat 11:00-da, 2022–2024-cü il təvəllüdlü uşaqlar üçün isə saat 15:00-da aktiv olacaq. Qəbul zamanı hər uşaq üçün maksimum 3 bağça seçmək imkanı mövcuddur və sistemdə mövcud növbələr yalnız boş yer olduqda sorğuya çevriləcək. Bu sorğunun qüvvəyə minməsi üçün valideyn 7 gün ərzində sənədləri müvafiq bağçaya təqdim etməlidir, əks təqdirdə sorğu silinəcək və növbə digər uşağa keçəcək. Qəbul prosesi yalnız elektron şəkildə – www.bq.edu.az portalı vasitəsilə həyata keçirilir. Önəmli qeyd isə budur ki, əvvəlki illərdə yaradılmış növbələr bu il üçün keçərli deyil, yalnız arxivə əlavə edilib və valideynlər sistemə yenidən daxil olub növbə yaratmalıdırlar.
Məktəbəqədər təhsil müəssisələri yalnız gündəlik uşağın saxlanıldığı məkan deyil – onlar uşağın psixososial və intellektual inkişafında mühüm rol oynayır. Bu dövrdə uşağın qavrama bacarığı, dil və nitq inkişafı, emosional tənzimləmə, sosial münasibət qurmaq vərdişləri, diqqət və yaddaş kimi əsas bacarıqları formalaşır. Bağçalar isə məhz bu bacarıqları qrup daxilində strukturlaşdırılmış fəaliyyətlər, oyunlar və öyrədici metodlarla dəstəkləyir. Erkən yaşda kollektivə uyğunlaşma gələcəkdə məktəbə, müəllimlərə və ümumiyyətlə tədris mühitinə adaptasiyanı asanlaşdırır. Həmçinin bağçaya gedən uşaqlar öz duyğularını ifadə etməyi, ardıcıl düşünməyi və sosial qaydaları mənimsəməyi daha tez öyrənirlər. Bu mərhələdə peşəkar pedaqoqların iştirakı ilə aparılan fəaliyyətlər uşaqların erkən diaqnostikasına, istedadlarının üzə çıxmasına və ehtiyac varsa, dəstək mexanizmlərinin vaxtında işə salınmasına da şərait yaradır.
Bağça seçimi isə valideynlər üçün çox diqqətli qərar olmalıdır. Əvvəla, bağçanın pedaqoji heyətinin hazırlıq səviyyəsi, yanaşma tərzi və proqramı mütləq şəkildə nəzərdən keçirilməlidir. Sırf yerləşmə yeri və ya estetik baxımdan gözəlliyi yox, bağçanın uşağa nə verəcəyi əsas meyar olmalıdır. İkinci önəmli nüans qrup sıxlığıdır: az sayda uşaqla çalışan müəllimlər hər bir uşağa daha çox diqqət ayıra bilir. Eyni zamanda, bağçada tətbiq olunan erkən inkişaf proqramları – məsələn, montessori, reggio, STEAM yönümlü yanaşmalar – müasir öyrənmə ehtiyaclarına daha çox cavab verir. Bağçanın təmizliyi, təhlükəsizlik standartları, qidalanma menyusu və valideynlərlə kommunikasiyası da seçim zamanı ciddi qiymətləndirilməlidir. Uşağın fərdi ehtiyaclarına həssas yanaşan, onu yarışa deyil, tərəqqiyə təşviq edən bir bağça uşağın sağlam psixoloji və sosial zəmin üzərində formalaşmasına böyük töhfə verəcək.
Beləliklə, bağçaya qəbul sadəcə qeydiyyat məsələsi deyil – bu, uşağın inkişaf yolunda atılan ilk ciddi addımlardan biridir. Doğru qərar gələcək üçün möhkəm təməl ola bilər, bu baxımdan valideynlər seçimi təkcə boş yer prinsipi ilə deyil, həm də övladlarının şəxsiyyət kimi formalaşmasına yönəlik perspektivlə etməlidirlər. Bağça seçmək sadəcə harada yer var sualına cavab vermək deyil, “bu mühit övladıma nə verəcək?” sualının arxasınca getməkdir.
Pərvanə,
AzNews.az