Balaca yaş, böyük qələbə – 7 yaşlı Banunun karate uğuru

İdman yalnız güc nümayişi deyil, həm də xarakterin, dözümlülüyün və iradənin aynasıdır. Bunu bir daha sübut edənlərdən biri də cəmi 7 yaşlı Banu Cumayeva oldu.

“SPORT MASTER İdman Klubu”nun təşkil etdiyi karate turnirində yüzlərlə idmançının arasında Banu öz döyüş ruhu və inadkarlığı ilə seçildi. 25 kq çəki dərəcəsində çıxış edən bu balaca idmançı tatamiyə çıxanda hamı sadəcə bir uşaq görürdü. Amma görüşlər başladıqca hər kəs onun içindəki böyük əzmi hiss etdi. Döyüşdən döyüşə irəliləyən Banu, nəhayət, qələbə qazanaraq fəxri kürsünün ən yüksək pilləsinə qalxdı.

Bu uğurun arxasında isə güclü bir komanda işi dayanır. Azərbaycanın Əməkdar məşqçisi, 3-cü dan qara kəmər sahibi Rəşidə Rəşidovanın rəhbərliyi ilə hazırlanan Banu bu qələbə ilə həm özünü, həm də müəllimini sevindirdi. Ən əsası isə, onun nailiyyəti bütün balaca karateçilərə “bacararam” inamını aşıladı.

Bu gün artıq karate sadəcə oğlanların idmanı deyil. Rəşidə xanım kimi məşqçilərin əməyi və Banu kimi gənc qızların uğurları göstərir ki, karate həm güc, həm zəriflik, həm də intizam deməkdir. Gənc qızların döyüş növlərində uğur qazanması cəmiyyətimizdə qızlara olan baxışı dəyişir, onların daha inamlı və güclü böyüməsinə yol açır.

Banu Cumayeva bu qələbəsi ilə bir daha sübut etdi: uğur yaşa baxmır. Əsas olan çalışmaqdı, inadkarlıqdı və özünəinam. Onun qələbəsi təkcə bir medal deyil, həm yaşıdlarına, həm valideynlərə, həm də bütün gənclərə ünvanlanan bir mesajdır: “İstəsən, bacararsan!”

Azərbaycan karateçiləri illərdir beynəlxalq arenada medal qazandırır, bayrağımızı yüksəklərə qaldırır. Bu gün Banu kimi uşaqlar tatamidə addımlarını atırsa, sabah dünya çempionatlarında, bəlkə də Olimpiya oyunlarında parlayacaqlar. Onların uğuru gələcəyin parlaq idman səhifələrinin başlanğıcıdır.

AzNews.az