“Azərbaycan və Çin arasında münasibətlər artıq strateji tərəfdaşlıq səviyyəsinə yüksəlib. Bu, hər iki ölkənin maraqlarına uyğundur. Çin tərəfindən irəli sürülən “Bir kəmər, bir yol” layihəsini dəstəkləyən ölkələr sırasında Azərbaycan da yer alır. Azərbaycan bu prosesdə fəal iştirak edir və Orta Dəhlizin əsas aparıcı amillərindən birinə çevrilir. Məhz Azərbaycanın təşəbbüsü ilə Orta Dəhlizin formalaşdırılması istiqamətində ciddi işlər görülür. Azərbaycanın həm Cənubi Qafqazda, həm də Orta Asiya respublikaları ilə qurduğu əməkdaşlıq məhz “Bir kəmər, bir yol” layihəsinin uğurla həyata keçirilməsi üçün real imkanlar yaradır”.
Bu fikirləri Aznews.az-a açıqlamasında politoloq Oqtay Qasımov deyib.
Xatırladaq ki, son illərdə beynəlxalq münasibətlər sistemində ciddi dəyişikliklər baş verir. Böyük güclər arasında yeni əməkdaşlıq formatları yaranır, qlobal nəqliyyat-logistika marşrutları yenidən formalaşdırılır və bu, ölkələrarası strateji tərəfdaşlıqların əhəmiyyətini daha da artırır. Bu kontekstdə Azərbaycan–Çin münasibətlərinin dərinləşməsi xüsusilə diqqətəlayiqdir. Azərbaycanın geosiyasi mövqeyi, iqtisadi potensialı və çoxtərəfli təşəbbüslərdə fəal iştirakı onu Çin üçün mühüm tərəfdaşa çevirib. İki ölkə arasında qurulan strateji əməkdaşlıq modeli isə yalnız ikitərəfli münasibətlərin deyil, həm də regional sabitlik və inkişafın göstəricisi kimi dəyərləndirilir.
Politoloqun sözlərinə görə, Çin son illərdə mühüm iqtisadi nailiyyətlər əldə edib və hazırda dünyanın ikinci ən böyük güc mərkəzi kimi çıxış edir.
“Dünyada yeni düzənin formalaşması prosesi gedir, çoxqütblü dünya sistemi yaranmaqdadır və Çin də bu qütblərdən birinin liderliyinə iddia edir. Bu baxımdan, gələcək perspektivdə Azərbaycan–Çin münasibətlərinin daha da inkişaf edəcəyi aydındır. Azərbaycan yerləşdiyi strateji-coğrafi mövqeyi, balanslı siyasəti və etibarlı tərəfdaş statusu ilə Çinin rəğbətini qazanmış ölkələrdən biridir. Bu səbəbdən, gələcəkdə həm Böyük İpək yolu, həm də “Bir kəmər, bir yol” layihələrinin reallaşmasında Azərbaycanın mühüm roluna ehtiyac var və bu rol artıq reallığa çevrilir. Çünki bu münasibətlər qarşılıqlı maraqlara əsaslanır. Azərbaycan Çinlə və digər tərəfdaşlarla əməkdaşlıq edərkən qarşılıqlı fayda prinsipinə əsaslanır. Bu isə rasional siyasət yürüdən bütün dövlətlər üçün məqbuldur. Çin də özünün stabil, rasional və təmkinli siyasəti ilə məhz bu cür tərəfdaşlarla işləməyə üstünlük verir və gələcək maraqlarının qorunması üçün əsaslı addımlar atır. “Bir kəmər, bir yol” layihəsinin həyata keçirilməsində Azərbaycanın önəmli rolu xüsusilə qeyd olunmalıdır”.
Politoloq əlavə edib ki, Azərbaycanın Orta Asiya türkdilli respublikaları ilə əlaqələri, Türkiyə ilə strateji müttəfiqliyi və Cənubi Qafqazda aparıcı mövqeyi bu layihələrin həyata keçirilməsi üçün real imkanlar formalaşdırır:
“Nəticədə, Avropa ilə Asiyanı – yəni Çinlə Londonu birləşdirəcək kommunikasiya xətti fəaliyyətə keçəcək. Bu, qlobal layihələrdən biri kimi həm Avropanın, həm də Asiyanın maraqlarına uyğundur. Azərbaycan isə öz coğrafi-strateji mövqeyindən düzgün istifadə etməklə bu proseslərdə aktiv iştirak edir, milli maraqlarını təmin edir və gələcək təhlükəsizliklə bağlı mühüm məsələləri həll etmiş olur”.
Rəfiqə Namazəliyeva,
AzNews.az