“ABŞ-ın Vaşinqton şəhərində tərəflər arasında sülh sazişi paraflanıb, yəni ümumi prinsiplər razılaşdırılıb, lakin hələ rəsmi olaraq imzalanmayıb. İmzalanma üçün sənəd hazırdır və yalnız bəzi görülməli məsələlər mövcuddur ki, tərəflər onları müzakirə edəcəklər. Vaşinqtonda keçirilmiş görüş Azərbaycan və Ermənistan arasında sülh sazişinin normallaşma prosesinə yönəlmiş mühüm addımdır. Bu, sülh müqaviləsinin imzalanması və normallaşma prosesi üçün əsas istiqaməti müəyyən edir. Çünki 10 noyabr bəyanatında nəzərdə tutulan məsələlər əsasən atəşkəs ilə bağlı idi və onu özündə ehtiva edirdi. Vaşinqton görüşü isə daha böyük, mühüm və proqresiv bir addımdır”.
Bu fikirləri Aznews.az-a açıqlamasında siyasi şərhçi Sədrəddin Soltan deyib.
Xatırladaq ki, 2020-ci il 10 noyabr tarixində Azərbaycan, Ermənistan və Rusiya arasında imzalanmış üçtərəfli bəyanat uzun müddət regionda əsas siyasi sənəd kimi çıxış edib. Bu razılaşma müharibədən sonrakı dövrdə atəşkəsin təmin olunması, yeni reallıqların qəbul edilməsi və müəyyən məsələlərin tənzimlənməsinə xidmət edirdi. Lakin son illərdə aparılan danışıqlar, xüsusilə ABŞ vasitəçiliyi ilə əldə olunmuş Vaşinqton razılaşması fonunda, həmin bəyanatın indiki aktual rolu və hüquqi qüvvəsi ilə bağlı suallar gündəmə gəlib. Ermənistan Baş naziri Nikol Paşinyanın açıqlamaları da göstərir ki, artıq Vaşinqton razılaşması ön plana çıxır və tərəflərin əsas istinad sənədinə çevrilir.
Siyasi şərhçi bildirib ki, bu, tərəflər arasında sülh müqaviləsinin imzalanması və normallaşma prosesinə xidmət edən bir istiqamətdir, atəşkəs isə sülh prosesinin ayrılmaz hissəsi kimi nəzərdə tutulur.
“Atəşkəs bəyanatında müəyyən müddəalar mövcud idi. Orada kommunikasiya ilə bağlı məsələlər var idi və ermənilər bu məsələ ilə bağlı bir müddət çətinlik yaratmışdılar. Rusiya isə bu məsələdə vasitəçilik etməyə çalışdı. Lakin Vaşinqton görüşü bu məsələyə nöqtə qoydu və gələcəkdə Ermənistan ərazisindən keçəcək Zəngəzur yolu üçün mühüm addım atıldı. Başqa sözlə, Vaşinqton görüşü sülh müqaviləsinin imzalanması, normallaşma prosesi və Zəngəzur yolu ilə bağlı mühüm addımlar atdığı üçün gələcək fəaliyyət əsasən Vaşinqton razılaşmaları əsasında aparılacaq. Bundan əlavə, ATƏT-in Minsk qrupunun ləğvi məsələsi də sentyabrın 1-i reallaşacaq. Odur ki, Vaşinqton görüşü ilə bəyanatın qüvvəsi və məqsədləri artıq həyata keçirildiyi üçün tamamlanmış sayılır”.
Rəfiqə Namazəliyeva,
AzNews.az