Donbas mübarizəsi: Zelenskinin qətiyyətli bəyanatı və Rusiyaya mesajı

Ukrayna Prezidenti Volodimir Zelenski Rusiyaya qarşı sərt mövqeyini bir daha nümayiş etdirib. Dövlət başçısı çıxışında Donbasın heç bir halda Kremlə güzəştə gedilməyəcəyini bildirib.

Zelenski qeyd edib ki, Rusiya Prezidenti Vladimir Putin uzun illər ərzində Donbası tam işğal etməyə çalışsa da, buna nail ola bilməyib:

“Putin 4 il ərzində Donbasın 30%-ni belə işğal edə bilməyib. Ona Donbası hədiyyə etməyəcəyəm. Ukrayna ordusu Donbası tərk etsə, Putinin davam etməyəcəyinə kim zəmanət verə bilər? Heç kim!”

Ukrayna lideri əlavə edib ki, Kreml müharibədə yalnız hərbi əməliyyatlara deyil, həm də sərt qış şərtlərinə bel bağlayır:

“Putin ümid edir ki, Rusiya qoşunlarının çata bilmədiyi ərazilərdə qışın soyuğu Ukrayna xalqını öldürəcək.”

Donbas bölgəsi uzun illərdir Ukrayna-Rusiya münaqişəsinin əsas mərkəzi olaraq qalır. Ərazinin sənaye və enerji baxımından əhəmiyyəti, həmçinin coğrafi mövqeyi onu Moskva üçün strateji hədəfə çevirib. 2014-cü ildən etibarən Donbasda separatçı qruplar Rusiya dəstəyi ilə fəaliyyət göstərsə də, Ukrayna ordusu mövqelərini qorumağa davam edir.

Zelenskinin sərt bəyanatı həm Ukrayna ictimaiyyətinə, həm də Qərb müttəfiqlərinə ünvanlanmış siqnal kimi qiymətləndirilir. Prezidentin sözləri Kiyevin mövqeyində heç bir güzəştin nəzərdə tutulmadığını göstərir. Bu bəyanat, xüsusilə də qışa az qalmış enerji böhranı və humanitar problemlərin artdığı bir dövrdə, beynəlxalq ictimaiyyətin diqqətini yenidən Ukraynaya yönəltməyə hesablanmış addım kimi də dəyərləndirilir.

Hazırkı vəziyyət göstərir ki, Ukraynanın müharibədə müqavimət gücü təkcə daxili resurslardan deyil, həm də Qərbdən aldığı hərbi və maliyyə dəstəyindən asılıdır. ABŞ, Avropa İttifaqı və NATO ölkələri tərəfindən verilən hava hücumundan müdafiə sistemləri, zirehli texnika və raketlər Donbas cəbhəsində Ukrayna ordusunun mövqelərini gücləndirib. Lakin ekspertlər hesab edir ki, bu yardım davam etməsə, Ukraynanın işğala qarşı uzunmüddətli müqavimət göstərməsi çətinləşə bilər.

Buna baxmayaraq, Zelenskinin bəyanatı həm ordunun döyüş ruhunu artırmaq, həm də Qərbi dəstəyin davam etdirilməsinə sövq etmək məqsədi daşıyır. Ukrayna lideri mesaj verir ki, Donbas təkcə Kiyevin deyil, həm də Avropanın təhlükəsizliyi üçün önəmli bir bölgədir.

AzNews.az