“Dünya siyasətində superdövlətlər arasında qarşıdurma gedir. ABŞ və NATO bloku ilə Rusiya arasında iqtisadi, siyasi və hərbi sahələri əhatə edən qlobal mübarizə davam edir. Bu qarşıdurmanın birinci mərkəzi Ukraynadır, ikinci mərkəzi isə Cənubi Qafqazdır. ABŞ və NATO Rusiyanı düşmən elan edərək onun ətrafında təsir dairələri yaradır və Rusiyanı müttəfiqləri ilə konfliktə sürükləyir. Rusiya-Ukrayna münaqişəsi ABŞ-ın strateji planının bir hissəsidir. Cənubi Qafqazda ABŞ və qərb Rusiya əleyhinə təsir göstərmək üçün Gürcüstan, Ermənistan və digər region dövlətlərini istifadə edir. Gürcüstan və Ermənistan kimi ölkələrdə qərbin dəstəyi ilə Rusiyanın nüfuzu zəiflədilir. Paşinyanın siyasəti, Ermənistanın Kollektiv Təhlükəsizlik Müqaviləsini boykot etməsi və Zəngəzur dəhlizini ABŞ-ın təsirinə verməsi bu gedişatın nümunəsidir. Bu regionda gərginlik böyük dövlətlərin maraqlarının toqquşması ilə formalaşır”.
Bu fikirləri Aznews.az-a açıqlamasında siyasi şərhçi Azad Məsiyev deyib.
Qeyd edək ki, Polşa üzərində Rusiya PUA-larının vurulması və NATO ilə gərginlik fonunda Prezident Putin Cənubi Qafqazda mövqeyini qorumaq üçün addımlar ata bilər. Rəsmi Bakı ilə davam edən gərginlik səbəbindən Azərbaycanın ABŞ və qərb ölkələri ilə əlaqələrinə sərt reaksiya veriləcəyi bildirilir.
Siyasi şərhçi qeyd edib ki, Azərbaycan balans siyasətini davam etdirir və qonşularla, eləcə də qlobal güclərlə əməkdaşlığını milli maraqlarına uyğun şəkildə qurur.
“Prezident İlham Əliyev və digər rəsmi şəxslərin tədbirləri Azərbaycan-Rusiya münasibətlərinin strateji əhəmiyyətini qoruyur. 2022-ci ilin fevralında Azərbaycan və Rusiya prezidentləri arasında imzalanan Dostluq və Əməkdaşlıq Sazişi iki dövlət arasında münasibətləri möhkəmləndirir. Bu münasibətlər həm Rusiyanın, həm də Azərbaycanın strateji maraqlarına cavab verir, çünki Azərbaycan üzərindən keçən Şimal–Cənub nəqliyyat dəhlizi və digər enerji layihələri Rusiyanın regional maraqları üçün əhəmiyyətlidir. Azərbaycan həm Rusiya, həm ABŞ, həm qərb ölkələri, həm də Çinlə əməkdaşlığı balanslaşdırır. Ölkə neytrallığını qoruyur və heç bir hərbi bloka qoşulmur. Azərbaycan-Türkiyə münasibətləri də regionda Rusiyanın mövqeyinə təsir edən faktorlardan biridir. Zəngəzur dəhlizinin açılması Rusiya və Azərbaycan arasında strateji əməkdaşlığın vacibliyini bir daha göstərir. Azərbaycanın milyonlarla vətəndaşı Rusiyada çalışır, buna görə də iki dövlət arasında münasibətlərin yaxşı olması hər iki tərəfin maraqlarına uyğundur. Azərbaycan-Rusiya münasibətləri həm strateji, həm iqtisadi, həm də regional stabillik baxımından əhəmiyyətlidir. Dövlət başçıları arasında yüksək səviyyəli əlaqələr və diplomatik dialoq mövcuddur. Müstəqil siyasət yürüdən Azərbaycan balanslaşdırıcı siyasətini praktikada həyata keçirir, eyni zamanda öz milli maraqlarını qoruyur. Ekspertlər də qeyd edir ki, siyasi təhlillərdə subyektiv sevgi və nifrət hisslərindən uzaq durmaq vacibdir”.
Siyasi şərhçi əlavə edib ki, nəticədə Azərbaycan-Rusiya münasibətlərinin sağlam olması həm iki dövlətin strateji maraqlarına cavab verir, həm də regionda sabitliyin təminatıdır:
“Bu münasibətlərin qorunması həm Şimal–Cənub dəhlizinin, həm enerji layihələrinin, həm də regiondakı ticarət və iqtisadi əməkdaşlığın uğurla həyata keçirilməsi üçün vacibdir. Eyni zamanda, Azərbaycan soydaşlarının Rusiyada rahat yaşaması və işləməsi üçün də iki ölkə arasında münasibətlərin yüksək səviyyədə olması zəruridir. Azərbaycanın balanslaşdırıcı siyasəti, qonşularla, qlobal güclərlə və beynəlxalq təşkilatlarla əməkdaşlıq bacarığı, həmçinin milli maraqlarını qorumaq qabiliyyəti regiondakı hər hansı layihənin yalnız Azərbaycan razılığı ilə həyata keçirilməsinə imkan verir. Bu baxımdan, Rusiya-Azərbaycan münasibətlərinin möhkəm olması həm strateji, həm iqtisadi, həm də regional stabillik üçün əhəmiyyətlidir”.
Rəfiqə Namazəliyeva,
AzNews.az