“Transxəzər Yaşıl Enerji Dəhlizi” layihəsinin texniki-iqtisadi əsaslandırmasının hazırlanmasına yaxın vaxtlarda başlanılacaq.
Bu barədə energetika naziri Pərviz Şahbazov “Qazaxıstan Enerji Həftəsi” çərçivəsində keçirilən tədbirdə çıxışı zamanı bildirib. Nazir qeyd edib ki, Asiya İnkişaf Bankı (ADB) və Asiya İnfrastruktur İnvestisiya Bankının (AIIB) dəstəyi ilə layihənin texniki-iqtisadi əsaslandırması hazırlanacaq.
Onun sözlərinə görə, “Transxəzər Yaşıl Enerji Dəhlizi” Avropanı Xəzər dənizi vasitəsilə Asiya ilə birləşdirən Orta Dəhlizin “yaşıl körpü” qismində inkişafına geniş imkanlar açacaq. Layihə region ölkələrinin elektrik enerjisi sistemlərini tarixdə ilk dəfə birləşdirəcək və qitələrarası enerji, rəqəmsal və nəqliyyat bağlantılarını gücləndirəcək.
Nazir həmçinin “Xəzər-Qara dəniz-Avropa”, “Azərbaycan-Türkiyə-Avropa” və “Azərbaycan-Gürcüstan-Türkiyə-Bolqarıstan” yaşıl enerji dəhlizləri layihələri barədə də məlumat verib. O vurğulayıb ki, bu dəhlizlərin “Transxəzər Yaşıl Enerji Dəhlizi” ilə inteqrasiyası regionun böyük bərpa olunan enerji potensialının Türkiyə və Avropa bazarlarına çıxarılmasına imkan yaradacaq.