“Malayziya Azərbaycanı həm müharibə dövründə dəstəkləyib, həm də hazırkı sülh prosesi zamanı da dəstəkləyir”.
Aznews.az xəbər verir ki, bu sözləri Malayziyanın Azərbaycandakı səfiri Ahmad Kamrizamil Mohd Riza APA-ya deyib.
“Biz Azərbaycanı beynəlxalq platformalarda dəstəkləmişik. Azərbaycan isə bizi iqtisadi sahədə dəstəkləyib. İki ölkə arasında iqtisadi əlaqələr, ticarət yüksəlməkdədir. Xalqlarımız arasında da münasibətlər güclənir”, - səfir deyib.
İki ölkə arasında əlaqələrin yüksək səviyyədə olduğunu qeyd edən səfir qarşıdan gələn illərdə bir sıra beynəlxalq tədbirlərə ev sahibliyi edəcək Azərbaycana Malayziyadan gələcək yüksək səviyyəli nümayəndə heyətlərinin səfərlərinin bu əlaqələri daha da inkişaf etdirəcəyini bildirib.
“Gələn ilin mayında Azərbaycan 13-cü Ümumdünya Şəhərsalma Forumuna (“WUF13)və iyun ayında İslam Əməkdaşlıq Təşkilatının Sammitinə ev sahibliyi edəcək. Biz hər iki qurumun üzvüyük. Malayziya bu forumun üzvü, İƏT-nın isə qurucu üzvlərindəndir. Bu tədbirlərdə iştirak etmək üçün Azərbaycana Malayziyadan çox yüksək səviyyəli nümayəndə heyətləri gələcək və keçiriləcək görüşlər ölkələr arasında əməkdaşlığın genişlənməsinə töhfə verəcək”, - səfir vurğulayıb.