Ramiz Mehdiyev və Əli Kərimlinin illərlə qurduqları gizli əməkdaşlıq, dövlət strukturunda və radikal müxalifət daxilində yaratdıqları şəbəkə, cəmiyyətə yönəltdikləri psixoloji təzyiq, manipulyasiya və xaos planları artıq hüquqi şəkildə üzə çıxır. Bu proses təkcə bir cinayət işinin istintaqı deyil - bu, Azərbaycan dövlətinə qarşı qurulmuş sistemli xəyanət mexanizminin dağıdılmasıdır.
Bu barədə AzNews.az-a Vəhdət Partiyasının sədri Adəm İsmayıl açıqlama verib. O, deyib:
"Mehdiyevin dövlətin içində illərlə topladığı korrupsiya resursları və Kərimlinin radikal şəbəkələri eyni məqsədə xidmət edib: hakimiyyəti zorla ələ keçirmək, konstitusiya quruluşunu dağıtmaq və Azərbaycanı destabilizasiya etmək. Onların xarici xüsusi xidmətlərlə əlaqələri, gizli maliyyə kanalları, bağ evlərində keçirilən görüşləri, cəmiyyətə davamlı şəkildə “çevriliş olacaq” mesajları ötürməkləri ölkənin milli təhlükəsizliyinə açıq təhdid idi.
Bu şəxslər illərlə xalqın ən həssas təbəqələrini-tələbələri, işsizləri, sosial çətinlik yaşayan insanları -manipulyasiya edib, onları öz siyasi ambisiyalarının alətinə çeviriblər. Cəmiyyətə qorxu, gərginlik və təxribat toxumu səpiblər. Bu, artıq siyasi fəaliyyət deyil; bu, xalis xəyanətdir.
Azərbaycan dövləti bu gün özünü təmizləyir. Şəbəkənin bir qolu Mehdiyevin iç çevrəsi, digər qolu Əli Kərimlinin radikal strukturları idi. Onlar birlikdə Azərbaycan dövlətçiliyinə zərbə vurmağa cəhd ediblər. Bu cəhdin qarşısı alınıb və alındıqca da alınacaq.
Hesab edirəm ki, bu şəbəkənin bütün həlqələri tam açılmalı, iştirak edən hər kəs — istər yüksək vəzifəli keçmiş məmur, istərsə də radikal müxalifət lideri - qanun qarşısında cavab verməlidir. Azərbaycan dövləti heç kəsə imtiyaz tanımamalıdır.
Bu proses Azərbaycanın gələcəyi üçün vacibdir. Dövlət daxilindəki qalıq strukturlar, köhnə şəbəkələr, illərlə toxunulmaz görünən qruplar tamamilə təmizlənməlidir. Azərbaycanın bu günkü gücü və sabitliyi belə təhlükələri kökündən məhv etməyi tələb edir. Azərbaycan dövləti güclüdür və bütün gizli şəbəkələri ifşa etməkdə qətiyyətlidir".
AzNews.az