Əli Kərimlinin xəyanət yolu yeni deyil. İllər ərzində biz onun milli satqınlığını sadəcə dövlətə münasibətdə deyil, xalqın maraqlarının əksinə olmasında da görürdük. Bu gün baş verən hadisələr bir daha sübut edir ki, Ramiz Mehdiyev və Əli Kərimli əslində tək dövlətə qarşı yox, məhz xalqa, milli iradəyə, Qarabağ Zəfərinə qarşı olub. Ramiz Mehdiyevin çirkin planları, bu planın tərkib hissələrindən biri və birincisi olan Əli Kərimli, onun kimi ünsürlər Azərbaycan qanunları qarşısında şübhə yoxdur ki, cavab verəcək. Azərbaycanın Dövlət Təhlükəsizliyi Xidməti və hüquq-mühafizə orqanları dövlətçiliyimizin keşiyində hər zaman qətiyyətlə dayanır.
Cənab Prezident İlham Əliyevin şəxsi təşəbbüsü ilə ölkədə siyasi dialoq mühitinin uğurlu inkişafı yolunda addımlar atılır. Bu addımlara dəstək vermək əvəzinə həmin bu insanların Azərbaycanın bütün uğurlarını, Zəfərimizi həzm edə bilmədiyinin şahidi olduq. Bəs xalq idi bunların amalı? Bəs millət idi bunları düşündürən? Özlərini “demokrat” adlandıran bu kəslərin kürəyini bu gün elə xalqın gücü yerə vurur.
Azərbaycanın bu gün regionda və dünyada artan nüfuzu, Orta Dəhlizdə aparıcı mövqedə olmağımız, uğurlu enerji layihələri, bayrağımızın suveren ərazilərimizdə dalğalanması, görünür, bunları sevindirmir, əksinə narahat edir. Xalq iradəsinə, milli təfəkkürə, vətəndaş həmrəyliyinə məhz Ramiz Mehdiyev, məhz onun Əli Kərimli kimi əlaltıları zərbə vururdular. İstənilən ən kiçik boşluğu belə fürsət, imkan kimi dəyərləndirirdilər.
Ramiz Mehdiyev kin-küdurət hisslərinə elə qərq olmuşdu ki, zaman-zaman dövlətçiliyə xidmət edən kəsləri qaralamağı da hədəf olaraq seçmişdi. Görünür qarşısına məqsəd qoymuşdu ki, Heydər Əliyev siyasətini dəstəkləyənləri aradan çıxartsın, onları qaralasın, ləkələsin. DTX və digər hüquq-mühafizə orqanları isə səbirlə, aramla iş gördü, milli maraqların əksinə olan istənilən kəslə bağlı indi də sayıq yanaşma ortaya qoyur. Bütün varlığı ilə Ümummilli Lider Heydər Əliyev siyasətinə və bu siyasətin davamına bağlı olan xalq bütünlüklə Ramiz Mehdiyevi də, Əli Kərimlini də, elə özünü hər sahə üzrə professor sayan Cəmil Həsənlini də nifrətlə anıb.
Azərbaycan dövlətini yox olmaq təhlükəsindən xilas edən qüvvə məhz Ümummilli Lider Heydər Əliyevdir. Məhz elə buna görə də xalq özü Heydər Əliyevə “Ümummilli Lider” adını layiq bildi. 2003-cü ildə bir daha məhz Ümummilli Lider Heydər Əliyev siyasətinə səs verərək xalqımız cənab İlham Əliyevi prezidentlik kürsüsündə gördü. 2024-cü ilin 7 fevral tarixində keçirilən ən son prezident seçkisi seçkidən daha çox ümumxalq bayramı oldu. Xalqımız tək avazla Müzəffər Ali Baş Komandanımızı alternativsiz, rəqibsiz olaraq hakimiyyətdə bir daha görmək istədi. Bu istək bütün vətəndaşlarımızın ümumxalq hədəfinə çevrildi.
Bu gün Ramiz Mehdiyev, Əli Kərimli, bu qruplaşmaya daxil olan istənilən məkirli ünsürün Azərbaycan xalqına əli belə çatmamalıdır. Çünki məhz bu insanlar illər ərzində xalqımızın Qarabağa əlini uzanıqlı qoydular, milli maraqları şəxsi maraqları yolunda qurban verdilər. Ramiz Mehdiyev, Əli Kərimli və qruplaşma üzvü olan hər kəs Azərbaycanın dövlət qanunları qarşısında cavab verməli, layiqli cəzalarını almalıdırlar. Cənab Prezident İlham Əliyev milli və dövlətçilik maraqlarımızı ən yüksək formada həyata keçirir. Qarşıya qoyulan məqsədlərin reallaşmasında Birinci vitse-prezident Mehriban Əliyeva dövlət başçımızın həyata keçirdiyi bu siyasətin uğurlarına sədaqətli şəxs kimi töhfə verir. Xalqımız Ramiz Mehdiyev, Əli Kərimli, Cəmil Həsənli və digər riyakar qruplaşmaları deyil, məhz bu tandemi mütləq şəkildə dəstəkləyir.
Aydın Hüseynov,
Milli Məclisin deputatı