Avropa Birliyi (AB) ABŞ ilə münasibətlərdə kritik bir mərhələyə daxil olunduğu barədə xəbərdarlıq edib. AB Komissiyasının sədri Ursula fon der Lyayen təhlükəsizlik əsaslandırması ilə gündəmə gətirilən əlavə gömrük rüsumlarını yanlış yanaşma adlandıraraq bildirib ki, Avropa dialoq və həll yolunun tərəfdarıdır, lakin zərurət yaranarsa birlik daxilində qətiyyətlə hərəkət etməyə hazırdır.
Fon der Lyayen AB Şurasının sədri Antonio Koşta ilə birlikdə Strasburqda keçirilən Avropa Parlamenti Baş Assambleyasında ABŞ-nin Qrenlandiya üzərindən gündəmə gətirdiyi gömrük rüsumu hazırlıqlarını dəyərləndirib.
“QRENLANDİYA STRATEJİ BÖLGƏDİR, LAKİN QƏRAR QRENLANDİYA XALQININDIR”
Avropanın təhlükəsizliyinin və Arktika bölgəsində baş verən proseslərin kritik əhəmiyyət daşıdığını vurğulayan fon der Lyayen qeyd edib ki, Qrenlandiya təkcə coğrafi ərazi deyil, həm də kritik xammal ehtiyatları və yeni dəniz yolları baxımından strateji mövqeyə malikdir.
Qrenlandiyanın azad və suveren xalqa sahib olduğunu xüsusi vurğulayan fon der Lyayen bildirib:
“Qrenlandiyanın gələcəyinə yalnız Qrenlandiya xalqı qərar verir. Suverenlik və ərazi bütövlüyü müzakirə mövzusu ola bilməz.”
“GÖMRÜK RÜSUMU TƏHDİDİ MÜTTƏFİQLİYƏ ZƏRBƏ VURUR”
AB ilə ABŞ-nin Arktika təhlükəsizliyi məsələsində ortaq anlayışa sahib olduğunu xatırladan fon der Lyayen, bu əməkdaşlığın xüsusilə NATO çərçivəsində davam etdiyini bildirib. Bununla yanaşı, təhlükəsizlik adı altında gündəmə gətirilən əlavə gömrük rüsumu təhdidini sərt şəkildə tənqid edib.
Fon der Lyayen deyib:
“Müttəfiqlər arasında belə bir gərginlik spiralı yalnız rəqibləri cəsarətləndirər. Təhlükəsizlik bəhanəsi ilə əlavə gömrük rüsumları tamamilə yanlışdır.”
AB liderlərinin məsələni sabah Brüsseldə müzakirə edəcəyini xatırladan fon der Lyayen əlavə edib:
“Bir yol ayrıcındayıq. Avropa dialoq istəyir, amma zərurət yaranarsa təcili və qətiyyətli addımlar atmağa da tam hazırdır.”
KOŞTA: “ƏLAVƏ TARİFLƏR TRANSATLANTİK MÜNASİBƏTLƏRLƏ UYUŞMUR”
AB Şurasının sədri Antonio Koşta da çıxışında Avropanın artan geosiyasi təzyiqlərlə üzləşdiyini bildirib. Rusiyanın Ukraynaya hücumu, beynəlxalq nizamın aşınması və mövcud ittifaqların sorğulanmasının bu prosesi daha da ağırlaşdırdığını vurğulayıb.
Koşta Avropanın bu böhranlardan daha güclü çıxacağını bildirərək bunun yalnız “prinsiplər Avropası”, “təhlükəsizlik Avropası” və “rifah Avropası” anlayışı ilə mümkün olduğunu deyib.
Danimarka Krallığı və Qrenlandiya ilə tam həmrəylik içində olduqlarını vurğulayan Koşta qeyd edib:
“Danimarkanın və Qrenlandiyanın gələcəyinə yalnız Danimarka və Qrenlandiya qərar verə bilər.”
“BEYNƏLXALQ HÜQUQ BAZARLIQ MÖVZUSU DEYİL”
NATO çərçivəsində Arktikada ortaq təhlükəsizlik maraqlarının olduğunu qəbul edən Koşta, buna baxmayaraq əlavə gömrük tarifələrinin transatlantik münasibətlərə zərər verəcəyini bildirib.
“Bu cür tariflər AB–ABŞ razılaşmaları ilə uzlaşmır,” – deyə Koşta xəbərdarlıq edib.
Avropanın hər cür təzyiqə qarşı özünü, üzv ölkələrini və şirkətlərini qorumağa hazır olduğunu deyən Koşta, ABŞ ilə ortaq maraqlar çərçivəsində konstruktiv dialoqun tərəfdarı olduqlarını da əlavə edib.
Beynəlxalq hüququn pozulmasına heç bir halda susmayacaqlarını vurğulayan Koşta belə deyib:
“Güclünün hüququnun zəifin haqqından üstün tutulmasını qəbul edə bilmərik. Beynəlxalq hüquq Ukraynada da, Qrenlandiyada da, Qəzzada da keçərlidir.”
Mövsüm,
AzNews.az