İsrail Prezidenti İshak Hersoq İranın gələcəyinin yalnız hakimiyyət dəyişikliyi ilə mümkün ola biləcəyini düşündüyünü bildirib, ölkə rəhbərliyini repressiv olmaqda və genişmiqyaslı pozuntularda ittiham edib.
Davosda keçirilən Dünya İqtisadi Forumunda çıxış edən Hersoq deyib:
“İran xalqı dəyişiklik arzulayır. İran xalqı dəyişiklik haqq edir. Onlar layiqli həyatı haqq edir.”
O əlavə edib:
“İran xalqı çox repressiv bir rejim altında yaşayır. Bu rejim minlərlə vətəndaşını qətlə yetirib, işgəncələr verir, həbs edir və minlərlə, bəlkə də on minlərlə ailəni məhv edir – İranın hər yerində.”
Hersoq bildirib ki, hakimiyyət orqanları onun “əsas insan tələbləri” adlandırdığı istəkləri boğmağa çalışır:
“Onlar insanların daha yaxşı həyat və azadlıq üçün təbii tələblərini əzməyə çalışırlar.”
O, İranda siyasi dəyişiklik olacağına ümid etdiyini deyib:
“Səmimi qəlbdən ümid edirəm və dua edirəm ki, İranda dəyişiklik baş versin. Çünki İran daha yaxşısına layiqdir, region daha yaxşısına layiqdir, dünya daha yaxşısına layiqdir.”
Hersoq qeyd edib ki, iranlılar çatışmazlıqlar və ağır iqtisadi vəziyyətlə üz-üzədir:
“Xalq ciddi şəkildə əziyyət çəkir. Qida və su qıtlığı var, bir çox digər əsas ehtiyaclar çatışmır. İqtisadiyyat tamamilə dağınıq vəziyyətdədir.”
İsrail Prezidenti vurğulayıb ki, İran xalqı üçün gələcək yalnız hakimiyyət dəyişikliyi ilə mümkündür və bunun son nəticədə iranlıların özləri tərəfindən, beynəlxalq ictimaiyyətin dəstəyi ilə müəyyənləşdirilməli olduğunu bildirib:
“Bu, sonda İran xalqının iradəsi və beynəlxalq ictimaiyyətin dəstəyi çərçivəsində olmalıdır.”
O həmçinin deyib:
“Mənim üçün aydındır ki, ayətullah hazırda kifayət qədər zəif və həssas bir vəziyyətdədir.”
Mövsüm,
AzNews.az