Arxeoloqlar İngiltərənin şimal-qərbində yerləşən Henning Vud mağarasında müxtəlif dövrlərə aid səkkiz nəfərin insan qalıqlarını aşkarlayıblar. Aşkar edilən qalıqlar arasında ən qədimi təxminən 11 min il əvvələ aid olan üç yaşlı qız uşağına məxsusdur.
Bu barədə “Proceedings of the Prehistoric Society” elmi jurnalı məlumat yayıb.
Araşdırmaya əsasən, mağaradan dəfn yeri kimi üç fərqli tarixi dövrdə istifadə olunub. Qalıqlardan biri erkən mezolit, dördü erkən neolit, ikisi isə erkən tunc dövrü ilə tarixləndirilir. Alimlərin fikrincə, bu tapıntı şimal-qərbi Avropada mağara dəfnləri ilə bağlı mövcud elmi təsəvvürlərin genişlənməsinə mühüm töhfə verir.
Genetik analizlərin nəticələrinə görə, araşdırılan fərdlərdən yalnız biri istisna olmaqla, digərlərinin bioloji cəhətdən qadın olduğu müəyyən edilib. Osteoloji və tafonomik tədqiqatlar göstərir ki, hər dövrdə dəfnlər ardıcıl şəkildə həyata keçirilib və yeni vəfat etmiş şəxslərin cəsədləri mağaranın şaquli giriş hissəsinə yerləşdirilib.
Mövsüm,
AzNews.az