ABŞ və İsrailin İrana qarşı hücumları 20-ci gündür davam edir. ABŞ-ın qoşun sayını artırmağı düşündüyü bildirilir və qeyd olunur ki, Pentaqon hava hücumlarını quru əməliyyatları ilə dəstəkləmək istəyir. Ağ Ev rəsmisi bildirib ki, hələlik yekun qərar verilməyib, lakin Tramp bu variantı müzakirədə saxlayır. ABŞ-ın potensial quru əməliyyatı Hörmüz boğazı sahillərinə, Hark adasına və uran yataqlarına yönələcək.
ABŞ, artıq oraya yollanan 5000 dəniz piyadasına əlavə olaraq, Yaxın Şərqə minlərlə əlavə əsgər göndərməyi də nəzərdən keçirir.
Reuters agentliyinə danışan rəsmilər ABŞ-ın strateji ərazilərə hərbi nəzarəti təmin etmək üçün quru qüvvələrindən istifadə edə biləcəyini bildiriblər.
Agentliyin məlumatına görə, potensial quru müdaxiləsi əsasən üç bölgəyə yönələcək.
Hörmüz boğazı sahili: Neft tankerlərinin təhlükəsiz keçidini təmin etmək üçün İran sahil xətti boyunca bufer zonalarının yaradılması və qurudan raket batareyalarının zərərsizləşdirilməsi.
Xark Adası: Məqsəd İranın neft ixracatının 90%-nin keçdiyi bu strateji adaya tam nəzarəti ələ keçirməkdir. Ekspertlər adanın infrastrukturunun tamamilə məhv edilməsinin baha başa gələcəyini, buna görə də "nəzarəti ələ almaq və onu idarə etmək" daha məntiqli bir seçim kimi qəbul edildiyini bildirirlər.
Uran ehtiyatları: İranın zənginləşdirilmiş uran ehtiyatlarının təhlükəsizliyini təmin etmək və ya ABŞ-a daşımaq. Bu əməliyyat Amerika Xüsusi Qüvvələri üçün ən riskli və ən mürəkkəb missiya kimi təsvir olunur.
Ağ Ev rəsmisi bildirib ki, quru əməliyyatı ilə bağlı hələlik yekun qərar verilməyib, lakin Prezident Tramp bu variantı mümkün variantlar arasında saxlayır. Vurğulanıb ki, ABŞ-ın əsas məqsədləri İranın ballistik raket imkanlarını neytrallaşdırmaq, donanmasını tamamilə məhv etmək, regional proksi qruplarla əlaqələrini kəsmək və nüvə silahı əldə etməsinin qarşısını almaqdır.
Bu arada ABŞ Milli Kəşfiyyat Direktoru Tulsi Qabbard davam edən hava əməliyyatları ilə bağlı vacib bir detalı paylaşıb. Qabbard bildirib ki, İranın uran zənginləşdirmə proqramı ağır bombardmanlar nəticəsində iflasa uğrayıb və yeraltı qurğuların girişləri "xüsusi sursatlardan istifadə edərək betonla möhürlənib".
Həmçinin Pentaqonun İrana qarşı hücumlar həyata keçirmək üçün Ağ Evə 200 milyard dollardan çox maliyyələşdirmə üçün müraciət etdiyi bildirilib.
"Washington Post" qəzetinin məlumatına görə, Ağ Evin Konqresdən nə qədər büdcə tələb edəcəyi hələ də məlum deyil və Müdafiə Nazirliyi son iki həftə ərzində müxtəlif maliyyələşdirmə paketləri təklif edib.
AzNews.az