Son dövrdə aparılan elmi araşdırma göstərib ki, ultra emal olunmuş qidalar kişilərdə həm çəki artımına, həm də hormonal balansın pozulmasına səbəb ola bilər. Nəticələr xüsusilə reproduktiv sağlamlıq baxımından ciddi risk siqnalları ortaya qoyur.
"Cell Metabolism" jurnalında dərc olunan tədqiqatda eyni kaloriyə malik fərqli qidalanma rejimləri müqayisə edilib. Buna baxmayaraq, ultra emal olunmuş qidalar qəbul edən kişilərdə çəki və yağ kütləsində artım müşahidə olunub. Təbii və az emal olunmuş qidalarla qidalanan qrupda isə bu təsir qeydə alınmayıb.
Hormonlarda azalma müşahidə olunub
Araşdırma zamanı yüksək kalorili ultra emal olunmuş pəhrizin sperm istehsalı ilə birbaşa əlaqəli olan FSH hormonu səviyyəsinin azalmasına səbəb olduğu müəyyən edilib. Bununla yanaşı, testosteron səviyyəsində azalma meyli və sperm hərəkətliliyində zəifləmə də qeydə alınıb. Bu nəticələr qidalanma vərdişlərinin kişi reproduktiv sağlamlığına ciddi təsir göstərə biləcəyini ortaya qoyur.
Qablaşdırma kimyəviləri də rol oynaya bilər
Tədqiqatda ultra emal olunmuş qida qəbul edən şəxslərdə bəzi ftalatların daha yüksək səviyyədə olduğu aşkar edilib. Mütəxəssislər qeyd edir ki, plastik və qablaşdırma materiallarından orqanizmə keçə bilən bu maddələr hormonal sistemə mənfi təsir göstərə bilər.
Araşdırma 43 nəfər üzərində aparılıb
Tədqiqatda 20–35 yaş arası 43 sağlam kişi iştirak edib. Onlar üç həftə ərzində növbə ilə ultra emal olunmuş və təbii qidalardan ibarət pəhriz tətbiq ediblər. Ara mərhələlərdə isə adi qidalanmaya qayıdılaraq qidaların emal səviyyəsinin təsiri birbaşa müqayisə olunub.
Mütəxəssislərdən xəbərdarlıq
Mütəxəssislər bildirir ki, hazır və paketlənmiş qidaların həddindən artıq istehlakı uzunmüddətli perspektivdə hormonal balansı poza bilər. Bu səbəbdən vətəndaşlara daha təbii və balanslı qidalanma tövsiyə olunur.
Eyni zamanda vurğulanır ki, bu araşdırma mühüm nəticələr təqdim etsə də, daha geniş miqyaslı və uzunmüddətli tədqiqatlarla təsdiqlənməsi vacibdir.
Mövsüm,
AzNews.az