Birləşmiş Ərəb Əmirliyi (BƏƏ) hakimiyyəti aviareyslərin tam bərpasından cəmi bir neçə gün sonra hava məkanında uçuşlara məhdudiyyətlər tətbiq edib.
Bloomberg agentliyinin pilotlar və personal üçün yayılmış rəsmi bildirişə istinadən verdiyi məlumata görə, bu addım təhlükəsizlik tədbirləri çərçivəsində atılıb.
Məlumata əsasən, BƏƏ bir neçə həftədən sonra ilk dəfə hava məkanını qismən bağlamağa məcbur olub. Buna səbəb İranın BƏƏ istiqamətində raketlər və pilotsuz uçuş aparatları (PUA) buraxmasıdır. Qeyd olunur ki, bu hadisə bir aydan az müddət əvvəl əldə edilmiş atəşkəsdən bəri baş verən ən ağır hərbi gərginlikdir.
Hazırda tətbiq edilən qərara əsasən hava məkanı tam deyil, qismən qapadılıb:
Uçuşlara yalnız əvvəlcədən müəyyən edilmiş xüsusi marşrutlar üzrə icazə verilir.
Tətbiq olunan bu məhdudiyyətlər ən azı mayın 11-nə qədər qüvvədə qalacaq.
Bu addım regionda hərbi aktivliyin yenidən artması və mülki aviasiyanın təhlükəsizliyinin təmin edilməsi məqsədilə atılıb.
Mövsüm,
AzNews.az