İran ABŞ bazalarına zərbələr endirdiyini açıqlayıb

İran Silahlı Qüvvələri Yaxın Şərqdə yerləşən ABŞ hərbi bazalarına qarşı həyata keçirdiyi cavab zərbələri zamanı müəyyən edilmiş hədəflərin ən azı 70 faizini vurduğunu iddia edib.

Bu barədə İranın Fars xəbər agentliyi mənbəyə istinadən məlumat yayıb.

Ballistik raketlərlə bir neçə ölkədəki bazalar hədəfə alınıb

Məlumata görə, İranın ballistik raketləri ABŞ-ın İordaniya, Küveyt və Bəhreyn ərazisində yerləşən hərbi obyektlərinə zərbələr endirib.

Mənbə əməliyyatın nəticələrinin qiymətləndirilməsinin davam etdiyini bildirib.

Hücumların səbəbi kimi əvvəlki insident göstərilir

Xəbərdə qeyd olunur ki, daha əvvəl ABŞ Mərkəzi Komandanlığı İran ərazisinə bir sıra zərbələrin endirildiyini açıqlamışdı. Bu əməliyyatlar Hörmüz boğazı üzərində ABŞ-a məxsus “Apache” helikopterinin vurulmasından sonra həyata keçirilib.

Buna cavab olaraq İran İslam İnqilabı Keşikçiləri Korpusu (SEPAH) Yaxın Şərqdə yerləşən ABŞ hərbi bazalarını hədəfə aldığını bəyan edib.

Mövsüm,

AzNews.az