Dünya əmtəə bazarlarında qiymətli metallar üzrə qiymətlərin geriləməsi müşahidə olunur. COMEX birjasında qızılın bir troya unsiyası üzrə 2026-cı ilin avqust fyuçerslərinin qiyməti 1,21% azalaraq 4 194,4 ABŞ dollarına düşüb. Eyni tendensiya gümüş bazarında da qeydə alınıb — 2026-cı ilin sentyabr fyuçersləri 1,07% ucuzlaşaraq 66,09 ABŞ dolları təşkil edib.
Qiymətlərdəki bu eniş qlobal maliyyə bazarlarında risk iştahının dəyişməsi, dolların mövqeyi və investorların qısa müddətli mənfəət realizasiyası ilə izah olunur. Qızıl və gümüş adətən qeyri-müəyyənlik dövrlərində “təhlükəsiz liman” kimi çıxış etsə də, hazırkı dinamika bazarda müvəqqəti korreksiya mərhələsinin formalaşdığını göstərir.
Bununla belə, qızılın hələ də 4 000 dollar üzərində qalması onun uzunmüddətli dövrdə yüksək qiymət diapazonunda saxlandığını göstərir. Bu, investorların qlobal iqtisadi riskləri tam olaraq aradan qalxmış hesab etmədiyini də ortaya qoyur.
Ümumilikdə, qiymətli metallar bazarında müşahidə olunan bu eniş daha çox texniki korrektə xarakteri daşıyır və qlobal maliyyə şəraitindən asılı olaraq növbəti mərhələdə yenidən dəyişə bilər.
Nuray
Aznews.az