Azərbaycanda Təhsilin İnkişafı Fondu yaradılacaq
26 Sentyabr 2013 15:25 (UTC+04:00)
Azərbaycanda Təhsilin İnkişafı Fondunun yaradılması nəzərdə tutulur.
APA-nın xəbərinə görə, bunu təhsil naziri Mikayıl Cabbarov Amerika-Azərbaycan Ticarət Palatasının (AMCHAM) təşkilatçılığı ilə keçirilən işgüzar görüşdə çıxışı zamanı bildirib.
Onun sözlərinə görə, nazirlik Təhsilin İnkişafı Fondunun yaradılması üzərində işləyəcək və spesifik olaraq həm Azərbaycan, həm də beynəlxalq səviyyədə lazımi səviyyədə çalışacaq.
Azərbaycanda məktəblərin kompüterlə təminatı məsələsindən danışan nazir qeyd edib ki, təhsildə informasiya texnologiyalarının tətbiqi geniş imkanlar yaradır: "Azərbaycanın təhsil sistemi internetə qoşulan iri bir şəbəkədir. Respublikada 1695 məktəb yüksək sürətli internetə qoşulub. Təhsildə informasiya texnologiyalarının tətbiqi geniş imkanlar yaradır. Lakin bu sahədə müəyyən nöqsanlar da var. Belə ki, bütün məktəblərdə kompüterlər var, amma internetə qoşulmayıblar. Onların hər birinin internetə qoşulması təmin edilməlidir".
AzNews.az