MDB müşahidəçiləri seçkilərlə bağlı hesabat yaydı
27 Sentyabr 2013 15:32 (UTC+04:00)
Azərbaycan Respublikası Prezidenti seçkilərinə hazırlığın gedişini və seçkilərin keçirilməsini müşahidə edən Müstəqil Dövlətlər Birliyindən olan Müşahidəçilər Missiyasından Aralıq Hesabat (10-25 sentyabr 2013-cü il) açıqlanıb. Sənəddə deyilir:
"Müstəqil Dövlətlər Birliyindən olan Müşahidəçilər Missiyası (sonrakı mətndə - Missiya) Azərbaycan Respublikası Hökumətinin dəvəti ilə Azərbaycan Respublikası Prezidenti seçkilərinə (sonrakı mətndə - seçkilər) hazırlığın və seçkilərin keçirilməsinin monitorinqini həyata keçirir.
Missiyanın fəaliyyəti Azərbaycan Respublikasının qanunvericiliyinə uyğun olaraq qurulur və seçkilərin təşkili və keçirilməsi, seçki prosesinin gedişinə və dövlətin daxili işlərinə qarışmamaq sahəsində beynəlxalq hüququn ümumtanınmış prinsiplərinə və normalarına əsaslanır. Missiyanın vəzifəsi azad və demokratik seçkilər keçirilməsinə kömək etməkdir.
Missiyanın və onun Qərargahının rəhbərliyi seçki kampaniyasının gedişini Konstitusiya Məhkəməsinin sədri F.Abdullayev, baş nazirin müavini Ə.Həsənov, daxili işlər naziri R.Usubov, Mərkəzi Seçki Komissiyasının sədri M.Pənahovla, Prezident Administrasiyasının və Xarici İşlər Nazirliyinin rəhbərliyi ilə müzakirə etmişlər. Görüşlərdə Missiyanın rəhbərliyinə məlumat verilib ki, respublikada ədalətli və açıq seçkilər keçirilməsi üçün zəruri şərait yaradılıb.
Seçkilər Azərbaycan Respublikasının Konstitusiyasına və Seçki Məcəlləsinə (sonrakı mətndə - Məcəllə) uyğun olaraq keçirilir.
Missiyanın Qərargahı Demokratiyanın, Parlamentarizmin İnkişafının və MDB Parlamentlərarası Assambleyasının İştirakçısı olan Dövlətlərin Vətəndaşlarının Seçki Hüquqlarına Riayət Edilməsinin Monitorinqi üzrə Beynəlxalq İnstitutun ekspertləri ilə birlikdə Azərbaycan Respublikasının seçki qanunvericiliyini təhlil edib.
Seçkilərin keçirilməsini Azərbaycan Respublikasının Mərkəzi Seçki Komissiyası (MSK), 125 dairə seçki komissiyası və 5300-dən çox məntəqə seçki komissiyası təmin edir.
Vətəndaşların seçki prosesinə etimad səviyyəsinin artırılması, səsvermə və səslərin hesablanması prosedurunun maksimum açıq və aşkar olması üçün, habelə pozuntu və saxtalaşdırma hallarının qarşısını almaq məqsədi ilə səsvermə otaqlarında 1000 veb-kamera quraşdırılıb. Bu, əvvəlki prezident seçkilərində olduğundan iki dəfə çoxdur.
Uzunmüddətli müşahidəçilər seçki kampaniyasının monitorinqi çərçivəsində Naxçıvan Muxtar Respublikasındakı 7 dairə seçki komissiyasının hər birində və bir sıra məntəqə seçki komissiyalarında, habelə Bakı, Gəncə, Lənkəran şəhərlərinin, Abşeron, Astara, Lerik, Xaçmaz və Şəmkir rayonlarının dairə və məntəqə seçki komissiyalarında olublar.
Müşahidəçilər qeyd edirlər ki, dairə və məntəqə seçki komissiyalarının rəhbərliyi və üzvləri ünsiyyət üçün açıqdırlar, onlar keçirilən seçkiqabağı tədbirlər haqqında zəruri informasiyanı təqdim edirlər.
Müşahidəçilər yəqin etmişlər ki, seçki məntəqələrinin seçkilər haqqında qanunvericilik aktları ilə, zəruri metodik tövsiyələr, təlimatlar, informasiya materialları ilə, habelə müvafiq avadanlıqla, o cümlədən şəffaf səsvermə qutuları və texnika ilə təmin edilməsi üzrə iş başa çatdırılıb. Fiziki imkanları məhdud olan şəxslərin səsvermədə iştirakını təmin etmək üçün zəruri hallarda səsvermə günü panduslar quraşdırılacaq.
Müşahidəçilər qeyd edirlər ki, ölkədə vətəndaşların qarşıdakı seçkilər haqqında məlumatlandırılması üzrə fəal iş aparılır.
Bu məqsədlə həm kütləvi informasiya vasitələrindən, həm də seçiciləri 2013-cü il oktyabrın 9-da seçkilərə gəlməyə çağıran poliqrafiya məhsulları şəklində əyani təşviqatdan geniş istifadə edilir.
Qarşıdakı seçkilərdə gənclərin seçki prosesinə cəlb edilməsi üçün MSK-nın dəstəyi ilə "Mən səs verirəm" layihəsinin təqdimatı keçirilib. Mərkəzi Seçki Komissiyasının məlumatına görə, builki seçkilərdə 500 minə yaxın gənc seçki hüququndan ilk dəfə istifadə edəcək.
Dairə və məntəqə seçki komissiyalarının ünvanları və telefonları, habelə seçki məntəqələrinin sərhədləri və səsvermə binalarının ünvanları yerli kütləvi informasiya vasitələrində dərc edilib.
Yerli icra orqanları və sərəncamverici orqanlar DSK ilə razılaşdırmaqla namizədlərin və onların müvəkkil etdiyi şəxslərin təşviqat kampaniyası dövründə kütləvi tədbirlər keçirə biləcəyi yerləri müəyyən etmişlər. Təşviqat işi, seçicilərlə görüşlər aparılması üçün yerlərin sayı artırılmışdır. Bu məqsədlər üçün açıq meydançalar, saraylar və mədəniyyət evləri müəyyən edilmişdir. Şəhərlərdə və digər yaşayış məntəqələrində prezidentliyə namizədlərin təşviqat məhsullarının yerləşdirilə biləcəyi informasiya stendləri düzəldilib.
Eyni zamanda, prezidentliyə namizədlərdən ikisi teledebatları qeyri-korrekt apardıqlarına görə Mərkəzi Seçki Komissiyası onlara ciddi xəbərdarlıq edib.
Birlikdən olan müşahidəçilər qeyd edirlər ki, Azərbaycan Respublikası Prezidenti seçkiləri kampaniyası Məcəlləyə uyğun və sakit şəraitdə keçir.
Missiya seçki kampaniyası monitorinqinə dair qəti qənaətini və monitorinqin nəticələrinin qiymətlərini seçkilər keçirildikdən sonra şərh edəcəkdir.(AzərTAc)
AzNews.az