Xalq artistimiz Türkiyədə beyin əməliyyatı keçirib
30 Sentyabr 2013 12:07 (UTC+04:00)
"Yaşar Nurinin ölümündən sonra möhkəm stress keçirdim.
Özümü çox pis hiss edirdim, başımda ağrılar vardı. Vəziyyətim qəfil dəyişirdi. Ad çəkmək istəmirəm, amma bunu gizlətməyəcəm ki, bizim həkimlər məni ümidsiz vəziyyətə saldılar, az qala oturub ölümümü gözləyirdim".
APA-nın məlumatına görə, bu sözləri bu gün keçirdiyi mətbuat konfransında xalq artisti Firəngiz Mütəllimova deyib. Onun sözlərinə görə, Türkiyədə beyin kavernomasından əməliyyat olunandan sonra, həyatına olan təhlükə sovuşub: "Mən Türkiyədə olanda haqqımda müxtəlif şayiələr dolaşırdı, əsassız söz-söhbətlər yaranmışdı. İstədim mətbuat konfransı vasitəsi ilə hər şeyə aydınlıq gətirəm. İndi yaxşıyam, işimə davam edəcəm. Altı saatlıq əməliyyatdan sonra canımda olan bütün ağrılar çəkildi. Türkiyəyə getməsəydim, bizim həkimlərin əlində vəziyyətimin necə olacağını bilmirəm".
Xalq artisti əlavə edib ki, növbəti həftədən Akademik Milli Dram Teatrında və Mədəniyyət və İncəsənət Universitetində işlərini davam etdirəcək. Xatırladaq ki, tibdə beyin kavernoması xoşxassəli, anadangəlmə şiş hesab olunur.
AzNews.az