Səfər Əbiyev Yunanıstan səfiri ilə görüşdü

2 Oktyabr 2013 13:12 (UTC+04:00)
Azərbaycanın müdafiə naziri general-polkovnik Səfər Əbiyev Yunanıstanın ölkəmizdəki fövqəladə və səlahiyyətli səfiri Dimitrios Tsounqası qəbul edib.

Müdafiə Nazirliyinin mətbuat xidmətindən Trend-ə verilən məlumata
görə, yeni səfiri təyinatı münasibətilə təbrik edən nazir Yunanıstan-Azərbaycan əlaqələrinin inkişaf etdirilməsinin vacibliyini qeyd edib.

Görüş zamanı səfir D.Tsounqas bütün sahələr üzrə ölkələrarası əməkdaşlığın möhkəmləndirilməsində səylərini əsirgəməyəcəyini bildirib.

Beynəlxalq təşkilatların, Avropanın aparıcı dövlətlərinin, xüsusilə, ATƏT-in Minsk qrupunun Dağlıq Qarabağ münaqişəsinin danışıqlar yolu ilə həlli üçün fəaliyyətlərini gücləndirmələrinə ciddi ehtiyac olduğunu bildirən S.Əbiyev əks təqdirdə bölgədə arzuolunmaz ağır problemlərin yaranacağını vurğulayıb.

Müharibənin hələ bitmədiyini xatırladan nazir Ermənistanı bir daha Azərbaycan torpaqlarını azad etməyə çağırıb: "Tezliklə Ermənistan bu təcavüzkar siyasətindən geri çəkilməsə, Azərbaycan Ordusu torpaqlarının işğaldan azad edilməsi üçün öz üzərinə düşən vəzifəni icra etmək məcburiyyətində qalacaq".

Görüş zamanı digər məsələlər barədə də fikir mübadiləsi aparılıb.

AzNews.az