YAP İlham Əliyevi təbrik etdi
12 Oktyabr 2013 08:19 (UTC+04:00)
Yeni Azərbaycan Partiyası dövlət başçısı, YAP-ın sədri İlham Əliyevə prezident seçkilərində möhtəşəm qələbə münasibətilə təbrik məktubu ünvanlayıb.
Bu barədə partiyadan məlumat verilib.
Təbrik məktubunda deyilir: "Möhtərəm cənab prezident, Azərbaycan xalqının böyük etimadını qazanıb yenidən Azərbaycan Respublikasının prezidenti seçilməyiniz münasibətilə Yeni Azərbaycan Partiyasının çoxminli üzvlərinin ən səmimi təbriklərini və sevinc hisslərini sizə çatdırmaqdan şərəf duyuruq. Ölkəmizdə keçirilən Prezident seçkilərində sizin möhtəşəm qələbəniz əsası Heydər Əliyev tərəfindən qoyulmuş böyük yolun və son 10 ildə əldə etdiyimiz uğurların xalqımız tərəfindən qətiyyətlə dəstəklənməsinin parlaq nümunəsidir".
Təbrik məktubunda daha sonra bildirilib ki, azad, şəffaf və ədalətli şəkildə keçirilən seçkilərdə yüksək səs çoxluğu qazanmağı Azərbaycan xalqının prezident İlham Əliyevə olan inamının və etimadının, xalq-iqtidar vəhdətinin bariz ifadəsidir: "Bu inamı yaradan sizin həyata keçirdiyiniz məqsədyönlü siyasət nəticəsində ölkəmizin dinamik inkişafı, insanların rifahının davamlı olaraq yaxşılaşması, sabitliyin qorunub saxlanması, Azərbaycanın regionun lider dövlətinə çevrilməsi, beynəlxalq əhəmiyyətli layihələrin həyata keçirilməsində həlledici rola malik olan, güclü və müstəqil siyasət aparan dövlət kimi dünyada özünü təsdiq etməsidir. Azərbaycanın BMT Təhlükəsizlik Şurasının üzvü olması və hazırda bu təşkilata sədrlik etməsi, kosmik ölkələr sırasına qoşulması hər bir vətəndaşın milli qürur və iftixar mənbəyinə çevrilib.
Xalqımız əmindir ki, növbəti beş ildə Sizin rəhbərliyiniz altında ölkəmiz ictimai və siyasi həyatın bütün sahələrində növbəti uğurlara imza atacaq, daha da güclü Azərbaycan qurulacaq və bu dövlətdə hər bir vətəndaş bundan sonra da sülh, əmin-amanlıq və sabitlik şəraitində rahat yaşayacaq.
Yeni Azərbaycan Partiyası üçün qürurverici haldır ki, sədri olduğunuz partiyanın hər bir üzvü seçkilərdə sizin qələbə əldə etməyiniz üçün yüksək fəallıq göstərib, təbliğat-təşviqat kampaniyasında yaxından iştirak edib. Sizə möhkəm can sağlığı, doğma Azərbaycanımızın daha da çiçəklənməsi, xalqın rifahının yüksəldilməsi yolunda yorulmaz fəaliyyətinizdə yeni-yeni möhtəşəm nailiyyətlər arzulayırıq".
AzNews.az