Yeni ilə olan hava proqnozu
25 Dekabr 2013 10:36 (UTC+04:00)
Bakıda Dünya Azərbaycanlılarının Həmrəylik Günü və Yeni il bayramında mülayim hava şəraiti gözlənilir.
Ekologiya və Təbii Sərvətlər Nazirliyindən verilən məlumata görə, ilkin proqnozlara əsasən, dekabrın 31-də və yanvarın 1-də Bakıda və Abşeron yarımadasında qar yağacağı gözlənilmir. Həmin günlərdə Bakıda və Abşeron yarımadasında havanın dəyişkən buludlu, əsasən yağmursuz keçəcəyi proqnozlaşdırılır.
Temperatur rejiminin bu günlərdəki kimi olacağı gözlənilir. Hazırda Bakıda və Abşeron yarımadasında havanın temperaturu 6-11 dərəcə istidir.
Ümumilikdə son 31 il ərzində Bakıda Dünya Azərbaycanlılarının Həmrəylik Günü (31 dekabr) və Yeni il bayramı (1 yanvar) günündə qar 2 dəfə yağıb. 2006-cı ildə gün ərzində, 2008-ci ildə isə dekabrın 31-dən 2009-cu ilin 1 yanvar tarixinə keçən gecə qar yağıb.
Digər illərdə isə həmin günlərdə Bakıda hava yağmursuz, bəzi illərdə isə yağışlı olub.
AzNews.az