Şahin Mustafayev vətəndaşları qəbul etdi
21 Fevral 2014 13:59 (UTC+04:00)
Fevralın 21-də iqtisadiyyat və sənaye naziri Şahin Mustafayev Qobustanda Şamaxı və Qobustan rayonlarından olan vətəndaşları qəbul edib.
Nazirliyin mətbuat xidmətindən verilən məlumata görə, vətəndaşlar sahibkarlıq fəaliyyəti, güzəştli kreditlərin verilməsi, istehsal, emal və xidmət sahələrinin yaradılması, kredit ittifaqının Sahibkarlığa Kömək Milli Fondu ilə əməkdaşlığa cəlb edilməsi, yerli istehsal məhsullarının ixracının dəstəklənməsi, əkin sahələrinin suvarılmasına köməklik göstərilməsi, sosial və s. məsələlərlə bağlı müraciət ediblər.
Vətəndaş müraciətləri diqqətlə dinlənilmiş, nazir Şahin Mustafayev İqtisadiyyat və Sənaye Nazirliyinin səlahiyyətlərinə aid məsələlərin həlli üçün aidiyyəti struktur bölmələrinin rəhbərlərinə müvafiq tapşırıqlar vermiş, bir sıra məsələlər yerindəcə həllini tapıb. Nazirliyin səlahiyyətlərinə aid olmayan məsələlərlə bağlı müraciətlər isə baxılması və müvafiq tədbirlərin görülməsi məqsədilə aidiyyəti qurumlara çatdırılmaq üçün qeydiyyata alınıb.
Qəbula gələn sahibkarlarla müzakirələr aparılmış, müasir heyvandarlıq komplekslərinin, iri taxılçılıq təsərrüfatlarının, logistik mərkəzlərin, istixanaların, yerli xammala əsaslanan sənaye müəssisəsinin yaradılması, çörək və şirniyyat, damazlıq yumurta, tikinti materialları istehsalı və s. sahələrlə bağlı təklifləri dinlənilmiş, investisiya layihələrinin maliyyələşdirilməsi barədə müvafiq göstərişlər verilib.
Qəbul günü birbaşa müraciət edən vətəndaşlar da nazir Şahin Mustafayev tərəfindən qəbul edilmiş, hər bir vətəndaşın müraciətinə diqqətlə yanaşılmış, müraciətlərin operativ həlli üçün qanunvericiliyə uyğun olaraq müvafiq tədbirlər görülüb.
Qəbulda 70 vətəndaş iştirak edib.
Qəbulda iştirak edən vətəndaşlar mərkəzi icra hakimiyyəti orqanları rəhbərlərinin bölgələrdə vətəndaşların qəbulunun təşkilinə və yaradılan şəraitə görə dövlət başçısına minnətdarlıq ediblər.
Qeyd edək ki, Qobustanda keçirilmiş qəbulla bağlı vətəndaşların məlumatlandırılması məqsədilə kütləvi informasiya vasitələrində əvvəlcədən müvafiq elanlar verilmiş, qəbula yazılmaq üçün əlaqə vasitələri göstərilib. Bundan başqa, Nazirliyin saytında və facebook səhifəsində vətəndaşların qəbula yazılması üçün "İqtisadiyyat və sənaye nazirinin şəhər və rayonlarda keçirilən qəbulu üçün müraciət" bölməsi yaradılıb.
AzNews.az