“Təhsildə olan problemləri gizlətmirik”- Mikayıl Cabbarov
17 Mart 2014 11:18 (UTC+04:00)
Təhsil Nazirliyi tərəfindən məktəblərdə aşkar edilən hər bir mənfi hal və problemlərə qarşı lazımi tədbirlər görülür.
Təhsil naziri Mikayıl Cabbarov APA-ya açıqlamasında deyib ki, nazir təyin olunduğu vaxtdan onlarla məktəb rəhbəri, direktorlar müxtəlif xarakterli pozuntulara görə işdən azad edilib: "Təhsil sistemində olan problemləri gizlətmirik. Nailiyyətlərimiz çoxdur, amma problemlərimiz də var. Problemlərlə mübarizə aparırıq və bu işlər gələcəkdə də davam etdiriləcək".
M. Cabbarov məktəblərdə şagirdlərin qiymətlərinin şişirdilməsi məsələsinə də münasibət bildirib. Nazirin sözlərinə görə, heç bir valideyn övladının qiymətinin şişirdilməsini istəməz. Onun fikrincə, valideynlər bununla övladına pislik etmiş olurlar: "Amma Azərbaycanın 4500 dövlət, 50-yə qədər özəl məktəbinin hər hansı birində bu baş verə bilər. Biz bunu inkar etmirik və belə hallara qarşı da mübarizə aparırıq".
AzNews.az