Bakıda müsabiqə keçiriləcək

20 Mart 2014 13:00 (UTC+04:00)
"Kainat" Gənclik Mərkəzinin təşkil etdiyi "İslam Dünyası (İndoneziya, Küveyt, Misir Ərəb Respublikası, Mərakeş, Türkiyə, Qazaxıstan, Özbəkistan, Türkmənistan, Qırğızıstan, Bosniya və Herseqovina, Başqırdıstan (Rusiya), Azərbaycan) gənc (20 yaşadək) klassik musiqi ifaçılarının 3-cü Beynəlxalq müsabiqəsi" çərçivəsində işıqlandırılması təklif olunan tədbirlərin cədvəli açıqlanıb.

Gənclik Mərkəzindən verilən xəbərə görə, müsabiqə ISESCO-nun, Gənclər və İdman, Mədəniyyət və Turizm, Xarici İşlər nazirliklərinin dəstəyi, Bakı Musiqi Akademiyasının iştirakı ilə keçiriləcək.

Müsabiqənin cədvəlinə əsasən, aprelin 7-də saat 12:00-da Bakı Musiqi Akademiyasında Azərbaycandan festivala qatılacaq iştirakçılar arasında seçim turu keçiriləcək. Aprelin 24-də saat 10:00-da Bakı Musiqi Akademiyasının böyük konsert zalında xarici ölkə nümayəndələrinin iştirakı ilə rəsmi açılış və beynəlxalq münsiflər heyəti qarşısında kiçik, ayın 25-də saat 11:00-da isə Azərbaycan Dövlət Filarmoniyasının kamera və orqan musiqisi zalında böyük yaş qrupu üzrə dinləmələr keçiriləcək. Ayın 26-da saat 10:00-da bir qrup qonaq və təşkilat komitəsinin üzvləri televiziya proqramında çıxış edəcəklər. Saat 11:00-dan 13:00-dək mədəni proqram çərçivəsində ekskursiyalar təşkil olunacaq. Saat 18:00-da isə Ü.Hacıbəyli adına Bakı Musiqi Akademiyasının böyük konsert zalında müsabiqə qaliblərinin mükafatlandırılması və finalçıların qala-konserti olacaq.(AzərTAc)