İran AEBA-dan dəlilləri istəyir
7 Sentyabr 2012 10:11 (UTC+04:00)
İran Atom Enerjisi üzrə Beynəlxalq Agentlikdən (AEBA) nüvə proqramından hərbi məqsədlər üçün faydalandığı iddialarını sübut edən dəlilləri istəyib. APA-nın məlumatına görə, bu barədə İranın AEBA-dakı daimi nümayəndəsi Əli Əsgər Sultaniyə agentliyin yığıncağındakı çıxışında tələb edib. O bildirib ki, ölkəsinin nüvə proqramı sülh məqsədlidir və heç bir nüvə obyektində hərbi məqsədlər üçün hansısa iş görülmür.
Ə. Sultaniyə ABŞ və İsrailə eyham vuraraq, İranın nüvə proqramının hərbi məqsədlərə xidmət etdiyi ilə bağlı iddiaların həmin ölkələrdən əldə olunmuş həqiqətə uyğun olmayan məlumatlardan qaynaqlandığını deyib: "AEBA bu ölkələrdən əldə etdiyi dəlilləri bizə də verməlidir". O deyib ki, bəzi ölkələr AEBA-nı istiqamətləndirməklə İrandan davamlı şəkildə nələrsə tələb edir və təzyiqlər göstərirlər: "AEBA ilə İran arasında əməkdaşlığın davam etməsi üçün bu qurum öz öhdəliklərini də yerinə yetirməlidir. Biz agentliklə əməkdaşlığı davam etdirməyə hazırıq. Ancaq AEBA-nın rəftarı və tələbləri bu əməkdaşlığa əngəl törədir".
Ə. Sultaniyə vurğulayıb ki, İranın nüvə proqramı ilə bağlı fəaliyyət göstərən bir çox elm adamı sui-qəsd nəticəsində qətlə yetirilib: "Bundan əlavə, nüvə obyektlərimizdəki kompyuterlər kiberhücuma məruz qalıb". O, AEBA-nın Parçin hərbi-sənaye kompleksi ilə bağlı peyk görüntülərinə əsaslanaraq, irəli sürdüyü iddiaları da təkzib edib: "Ümumiyyətlə, İranın nüvə proqramının hərbi məqsədlərə xidmət etməsinə sübut kimi göstərilən peyk görüntüləri saxtadır. Parçin hərbi-sənaye kompleksində sülh məqsədlərinə xidmət etməyən heç bir iş görmür. Bu obyektdəki hərbi fəaliyyətlərimizin agentliklə heç bir əlaqəsi yoxdur".
AzNews.az