Bilik Fondu müəllimlərin peşə bayramını təbrik etdi
30 Sentyabr 2014 14:44 (UTC+04:00)
Azərbaycan Respublikasının Prezidenti yanında Bilik Fondunda Müəllim günü ilə bağlı "Azərbaycan müəllimi bu gün" mövzusunda dəyirmi masa keçirilib.
AzNews.az Azərbaycan Respublikasının Prezidenti yanında Bilik Fonduna istinadən xəbər verir ki, Fondun direktoru Oktay Səmədov qonaqları qarşıdan gələn Beynəlxalq Müəllimlər Günü münasibəti ilə təbrik edib. Fondun maarifçiliklə bağlı layihələrindən geniş bəhs edən icraçı direktor müəllimlərin bu layihələrdə yaxından iştirakının vacibliyini vurğulayıb.
Dəyirmi masada əməkdar müəllim, pedaqoji elmlər doktoru, professor, Təhsil Şurasının sədri Əjdər Ağayev çıxış edib. Müəllimlik peşəsinin müqəddəsliyindən danışan professor hər bir şagirdə fərdi yanaşmanın zəruriliyini və təlim-tərbiyyə prosesinin fədakarlıq tələb etdiyini deyib. "Bir şagirdin qəlbini fəth etmək bir ölkə fəth etməkdən daha alidir".
Dəyirmi masada Qaradağ rayonu, 320 saylı orta məktəbin direktoru Namik Cəfərov, Xətai rayonu Heydər Əliyev adına liseyin direktoru Fikrət Xəlilov, Xəzər rayonu, Buzovna qəsəbə, 26 saylı orta məktəbin direktoru Natiq Səmədov, Binəqədi rayonu, R.Əliyev adına 3 saylı tam orta məktəbin direktoru Nizami Novruzov, Nəsimi rayonu, 46 saylı orta məktəbin direktoru Sevinc Budaqova, Səbail rayonu, 160 saylı Klassik Gimnaziyanın direktoru Faina Ələkbərova, Nizami rayonu, Ə.Mahmudov adına 220 saylı məktəb-liseyin direktoru Almaz Əsgərova, BSU-nun Məktəb lisey Kompleksinin direktor müavini Naibə Kərimli və kompleksin birinci sinif şagirdləri, Ali məktəblərin pedaqoji fakültələrinin tələbələri və Fondun əməkdaşları iştirak ediblər.
Dəyirmi masada təhsillə bağlı müzakirələr aparılıb. Əjdər Ağayev tələbələri maraqlandıran sualları cavablandırıb. İştirakçılar belə tədbirlərin davamlı keçirilməsinə ehtiyac olduğunu bildiriblər. Nəsimi rayonu, 46 saylı orta məktəbin direktoru Sevinc Budaqova növbəti dəyirmi masanın keçirilməsi üçün Fondun əməkdaşları və həmkarlarını rəhbərlik etdiyi məktəbə dəvət edib.
Sonda birincilər müəllimlər üçün şeirlər səsləndiriblər.