Bilik Fondu Dillər Universitetində görüş keçirib - FOTOLAR
13 Fevral 2015 15:10 (UTC+04:00)
Bilik Fondunun icraçı direktoru Oktay Səmədov və əməkdaşları Azərbaycan Dövlət Dillər Universitetinin rəhbərliyi, professor-müəllim heyəti və tələbə kollektivi ilə görüşüblər.
AZNEWS.AZ xəbər verir ki, bu haqda məlumatı Azərbaycan Respublikasının Prezidenti yanında Bilik Fondunun İnformasiya Təminatı sektoru yayıb.
Məlumata görə, Universitetin tərbiyə işləri üzrə prorektoru, professor Ələddin Əliyev bildirib ki, Bilik Fondunun universitetlərlə sıx əlaqələr qurması təhsilin inkişafına, cəmiyyətin maariflənməsinə böyük təkandır. Professor Dillər Universitetinin Bilik Fondu ilə uğurlu əməkdaşlıq edəcəyinə, tələbə və müəllimlərin Fondun layihələrinə cəlb olunacağına əminliyini bildirib.
Bilik Fondunun icraçı direktoru Oktay Səmədov Fondun fəaliyyət istiqamətləri, həyata keçirdiyi layihələr barədə ətraflı məlumat verib, bildirib ki, ziyalılar cəmiyyətin maarifləndirilməsində birgə və sistemli fəaliyyət göstərsələr, ölkənin tərəqqisində daha uğurlu nəticələr əldə etmək olar.
Fondun Könüllülər Birliyindən danışan O.Səmədov universitetin kollektivini Könüllülərin sıralarına qoşulmağa çağırıb.
Görüşdə Bilik Fondunun fəaliyyətini geniş əks etdirən filmin nümayişindən sonra iştirakçıların sualları cavablandırılıb, təklifləri qeydə alınıb.