Azərbaycan Ali Soveti Moskvaya etiraz etdi – Ermənistanla bağlı (24 il öncə)
6 May 2015 10:16 (UTC+04:00)
Tarixdə bu gün mayın 6-da İnsan Alverinə Qarşı Mübarizə Günüdür. Azərbaycan Respublikası Prezidentinin 6 may 2004-cü il tarixli sərəncamı ilə təsdiq olunmuş "Azərbaycan Respublikasında İnsan Alverinə Qarşı Mübarizə üzrə Milli Fəaliyyət Planı" hazırlanıb. Daxili İşlər Nazirliyi, Beynəlxalq təşkilatların dəstəyi ilə 2009-cu ildən başlayaraq hər il may ayının birinci həftəsi "İnsan alverinə qarşı mübarizə həftəsi", mayın 6-sı "İnsan alverinə qarşı mübarizə günü" kimi qeyd edilir.
1668 - Fransız yazıçısı Alen Rene Lesaj (Alain René Lesage, 1668-1747) anadan olub.
1856 – Azərbaycanın ilk maarifçi qadınlarından biri, milli mətbuatımızın banisi Həsən bəy Zərdabinin xanımı Hənifə Məlikova (1856-1929) anadan olub. Bakıda "Nicat" xeyriyyə cəmiyyətinin qadınlar şöbəsini qurub, 1901-ci ildə H.Z.Tağıyevin həyat yoldaşı Sona xanımın himayəsi altında fəaliyyətə başlayan ilk Rus-Müsəlman Qadınlar Məktəbinin direktoru olub.
1856 - Dünya ədəbiyyatı və mədəniyyətində dərin iz qoymuş psixoanaliz nəzəriyyəsinin banisi, Avstriya alimi Ziqmund Freyd (Sigmund Freud 1856-1939) anadan olub. Əsərləri: "Yuxuların yozulması", "Totem və tabu", "Ləzzətin o tərəfində", "Bir illüziyanın gələcəyi".
1868 - Polyak yazıçısı, ədəbiyyat üzrə Nobel mükafatı laureatı Vladislav Reymont (1868-1925) anadan olub. Əsərləri: "Kişilər" romanı, "1794" tarixi trilogiyası və s.
1884 - Maarif xadimi Mirzəzadə Qafur Ələkbər oğlunun (Qafur Rəşad) (06.05.1884-26.11.1943) anadan olmasının 130 illiyi. Milli məktəblərin dərsliklərlə təmin olunması sahəsində Qafur Rəşadın xidmətləri böyükdür. İlk coğrafiya dərsliklərinin yaradıcısı olan Qafur Rəşad "Qafqaz coğrafiyası" (1910), "İbtidai coğrafiya" (1922), "ümumi coğrafiya" (1923), "Coğrafiya terminləri lüğəti" (1923), "SSRİ-nin iqtisadi coğrafiyası" (1941), "Xəritə üzərində əməli iş" (1943) və s. adlar altında 18 dərslik və vəsait yazıb nəşr etdirmişdi. Bununla yanaşı, milli uşaq ədəbiyyatının inkişafında da Qafur Rəşadın xidmətləri böyükdür. O, Azərbaycanda "Məktəb" adlı sayca ikinci uşaq jurnalının (1911- 1920) və uşaqlara məxsus ədəbiyyat nəşr edən eyniadlı birinci mətbəənin təsisçisidir (Əbdürrəhman Tofiq Əfəndizadə ilə birgə).
1904 - İsveç yazıçısı və şairi, Nobel mükafatı laureatı (1974) Harri Edmund Martinson (1904-1978) anadan olub.
1921 – I Ümumazərbaycan sovetlər qurultayı (6-19 may) işə başlayıb. Qurultayda Azərbaycan SSR-in ilk Konstitusiyası qəbul olunub. Müvəqqəti İnqilab Komitəsi və yerlərdəki inqilab və yoxsul komitələri ləğv edilib, ali qanunverici orqan olaraq Mərkəzi İcraiyyə Komitəsi (MİK, ilk sədri Muxtar Hacıyev) və yerli sovetlər yaradılıb. Azərbaycan Mərkəzi İcraiyyə Komitəsinin (75 üzv və 25 namizəd) rəhbər orqanı isə respublika partiya (Azərbaycan KP) rəhbərliyinin də daxil olduğu Rəyasət Heyəti (13 nəfərdən ibarət) idi. Respublikada 30 min deputatı olan 1400 yerli kənd soveti təşkil edilib. 1921-1937-ci illərdə Ümumazərbaycan sovetlərinin 9 qurultayı keçirildi və 1938-ci ildə bu qurumu Ali Sovet əvəzləyib.
1922 – Tanınmış Rusiya aktyoru, SSRİ Xalq artisti Vladimir Abramoviç Etuş anadan olub. "Qafqaz əsiri" (Saaxov), "İvan Vasilyeviç peşəsini dəyişir" (Şpak) və s. filmlərdə yaddaqalan komik obrazlar yaradıb.
1942 - Hicran Soltan oğlu Hüseynov — aktyor, diktor, redaktor, Azərbaycanın əməkdar artisti (2006) Qəbələ rayonunda dünyaya gəlib.1971-ci ildən AzTV-də əmək fəaliyyətinə başlayan Hicran Hüseynov ali dərəcəli diktor vəzifəsinə qədər yüksəlib. Əsasən gənclər üçün hazırlanmış proqramların aparıcısı kimi, sonralar informasiya proqramlarının, "Günün ekranı" və "Xəbərlər" proqramının daimi aparıcısı kimi fəaliyyətini davam etdirib.
1947 – Tanınmış dilçi alim, filologiya elmləri doktoru, professor Firudin Ağasıoğlu (Cəlilov) Qərbi Azərbaycanın Vedibasar mahalında doğulub. Türkologiyaya, türk dillərinin morfonologiyasına dair tədqiqatların müəllifidir. Ali Sovetin (1991-1995) deputatı , 1992-1993-cü illərdə respublikanın təhsil naziri olub.
1960 - Fransız aktrisası Ann Pariyo (Anne Parillaud) anadan olub. "Nikita" serialındakı baş rolu ilə məşhurlaşıb.
1961 - Amerika kino aktyoru, rejissor, ssenarist Corc Kluni (George Timothy Clooney) anadan olub. Filmləri: "Siriana" ("Oskar" mükafatı), "Qürubdan gündoğanadək", "Nazik qırmızı sap", "Xələflər".
1991 – Azərbaycan Ali Sovetinin Rəyasət Heyəti Ermənistan parlamentinin Dağlıq Qarabağ münaqişəsini SSRİ xalq deputatları qurultayının müzakirəsinə çıxarmaq cəhdinə etiraz olaraq Moskvaya, SSRİ Ali Sovetinə müraciət qəbul edib. Müraciətdə nəzərə çatdırılırıb ki, Ermənistanın hərəkəti Azərbaycanın müttəfiq respublika kimi suverenliyinə kobud müdaxilədir. Mayın 7-də SSRİ Ali Soveti Ermənistanın təşəbbüsünü rədd edib.