Suriya BMT-yə 108 nəfərlik siyahı göndərdi

20 Oktyabr 2012 08:39 (UTC+04:00)

Suriya ölkəsində vətəndaş müharibəsinin olmadığı barədə iddialarını əsaslandırmağa başlayıb. AzNews.az-ın qərb mətbuatına istinadən verdiyi xəbərə görə, Suriya hökuməti ölkədə terrorçuluqla məşğul olan 108 xarici vətəndaşın siyahısını BMT-yə göndərib.

Siyahıda onların hansı səbəbdən saxlanıldığı və şəxsi məlumatları da yer alıb. Suriya bununla bir daha BMT-yə sübut etməyə çalışıb ki, ölkədə müxalifət kimi təqdim olunan insanların böyük əksəriyyəti xaricdən gətirilmiş döyüşçülərdir ki, onların da xarici xüsusi xidmət orqanları ilə birbaşa və ya dolayı əlaqəsi var.

Siyahıda yer alan insanların vətəndaşlığına gəldikdə, onların 46-sı Tunis, digərləri isə İraq, Livan, Misir, İordaniya, Liviya və digər ərəb ölkələrindəndir.

Sadiq Musa
AzNews.az