MSK-dan namizədlərin qeydiyyatı ilə bağlı – Xəbərdarlıq
12 Sentyabr 2015 10:57 (UTC+04:00)
Mərkəzi Seçki Komissiyasından (MSK) AzNews.az-a verilən məlumata görə, seçkilərlə əlaqədar namizəd və ya onun səlahiyyətli nümayəndəsi, siyasi partiyanın, siyasi partiyalar blokunun səlahiyyətli nümayəndəsi tərəfindən namizədlərin qeydə alınması üçün zəruri olan seçki sənədlərinin təqdim edilməsi üçün ayrılan müddət sentyabrın 12-dən başlayıb, oktyabrın 2-də saat 18:00-da başa çatacaq. Seçki Məcəlləsinə əsasən parlament seçkilərində namizədin qeydə alınması üçün zəruri olan seçki sənədlərinin təqdim edilməsinə səsvermə gününə ən çoxu 50 və ən azı 30 gün qalmış saat 18.00-dək vaxt ayrılmalıdır.
Dairə seçki komissiyaları sənədlər qəbul olunduqdan sonra 7 gün müddətində imza vərəqələrində və təqdim edilən digər sənədlərdə olan məlumatların düzgünlüyünün yoxlanılması və namizədin qeydə alınıb-alınmaması haqqında qərar qəbul edəcək.
Oktyabrın 12-dək isə MSK tərəfindən qeydə alınmış namizədlərin seçki dairələri üzrə siyahısının dövri nəşrlərdə dərc edilməsi təmin olunacaq.
Sevinc Yasinqızı
AzNews.az