Səfər Əbiyev həbs edilə bilər - Vəzifədən sui-istifadə
18 Sentyabr 2015 16:07 (UTC+04:00)
AzNews.az xəbər verir ki, prosesdə təqsirləndirilən şəxs ifadəsində özünü təqsirli bilməyib və bütün işləri keçmiş müdafiə naziri Səfər Əbiyevin göstərişi ilə icra etdiyini deyib.
Sabiq polkovnikin bu ifadəsi uzun zamandır müzakirəsi gedən Səfər Əbiyevin həbsi ehtimalını bir qədər də yaxınlaşdırdı.
Hərbi jurnalist, ehtiyatda olan polkovnik-leytenant Üzeyir Cəfərov modern.az saytına deyib ki, kimliyindən asılı olmayaraq hər kəs əgər qanunsuzluq edibsə, cavab verməlidir:
"Hesab edirəm ki, səslənən fikirlərə sonda məhkəmə hüquqi qiymət verəcək. İstənilən halda, qanun qarşısında hamı cavabdehlik daşıyır. Kimsə qanun pozuntusuna yol veribsə, o mütləq mənada qanun qarşısında məsuliyyət daşıyır".
Ekspertin sözlərinə görə, Mehman Səlimov verilən tapşırıqda qanun pozuntusu olduğunu bilirdisə, onu icra etməkdən imtina edə bilərdi:
"Çünki bu, qanunda öz əksini tapıb. Bildiyiniz kimi, hərbinin özünəməxsus özəllikləri var. Hərbidə belədir, insan tabeçilik münasibətlərində olur və tabesində olduğu şəxsin əmr və göstərişlərini icra edir. Bununla bağlı qanunda göstəriş var ki, əgər vəzifəli şəxs yerinə yetirdiyi əmrin qanuna zidd olduğunu düşünürsə, onu yerinə yetirməkdən imtina edə bilər.
İstənilən halda məhkəmənin son qərarını gözləmək lazımdır".
Üzeyir Cəfərov bildirir ki, araşdırma nəticəsində Səfər Əbiyevin günahı sübuta yetirilərsə, o, həbs edilən ilk nazir olmayacaq:
"Əgər Mehman Səlimovun səsləndirdiyi fikirlər təsdiqini taparsa, Səfər Əbiyev də məsuliyyətdən yaxa qurtara bilməz. Azərbaycan reallığında hətta hakim partiyanın üzvü olan nazirlərin törətdiklərə əməllərə görə məsuliyyətə cəlb olunduğunun şahidi olmuşuq".